काठमाडौं । आगामी प्रदेश सभा र प्रतिनिधिसभा निर्वाचनका लागि राजनीतिक दलहरुले समानुपातिकतर्फका उमेदवारको नामावली निर्वाचन आयोगमा बुझाएका छन् ।

बेलुकासम्म नै उनीहरुले सूची बुझाएका हुन् । प्रमुख निर्वाचन आयुक्त डा. अयोधिप्रसाद यादवले आयोगमा दर्ता भएका राजनीतिक दलहरुले दुवै तहको निर्वाचनका लागि समानुपातिक उमेदवारको बन्दसूची आयोगमा बुझाउने प्रकृया सुरू गरेको जानकारी दिए । आइतबार बेलुका आयोगमा पत्रकारहरुसँग संक्षिप्त कुरा गर्दै उनले यस्तो बताएका हुन् ।

उनले केही ढिलाई गरेर भए पनि सबै राजनीतिक दलहरुले उत्साहका साथ धैर्यतापूर्वक समानुपातिक उमेदवारहरुको  बन्दसूची बुझाएको पनि स्पष्ट पारे ।

निर्वाचन आयोगले समानुपातिकतर्फको उमेदवारको सूची बुझाउन आईतबार विहान १० बजदेखि अपरान्ह ५ बजेसम्मको समयसीमा तोकेको थियो । तर, ठूला दलहरु कांग्रेस, एमाले, माओवादी केन्द्र लगायतका राजनीतिक दलहरुले भने केही ढिला गरी समानुपातिकतर्फको उमेदवारको बन्दसूची आयोगमा बुझाएका हुन् । 

आगामी मंसिर १० र २१ गते प्रदेश सभा र प्रतिनिधि सभा निर्वाचनका लागि ८८ वटा दल दर्ता भएका छन ।

दलहरुले समानुपातिकतर्फको सूची बुझाउँदा कम्तिमा ५० प्रतिशत महिला हुनुपर्ने कानुनी व्यवस्था छ । निर्वाचन आयोगले अब प्रदेशसभा र प्रतिनिधि सभा निर्वाचनलाई सफल बनाउन सरकार र राजनीतिक दलहरुको महत्वपूर्ण भूमिका निर्वाह गर्ने विश्वास पनि व्यक्त गरेको छ । 

प्रमुख निर्वाचन आयुक्त डा. यादवले निर्वाचन आचारसंहिता उल्लंघन नगर्न पनि सरकार र राजनीतिक दलहरुलाई पुनः सचेत गराएका थिए ।

प्रदेश सभाका लागि २ सय २० र प्रतिनिधि सभाका लागि १ सय १० जना समानुपातिक तर्फको उमेदवारको नामावली दलहरुले बुझाएका छन् । पेस गरेको सूची सच्याउन परेमा कात्तिक १२ गतेसम्मको समय दिइएको छ ।
तस्बिर रासस