काठमाडौं । नक्कली शैक्षिक प्रमाणपत्र पेश गरी चिकित्सक बनेको अभियोगमा प्रहरीले ठगी मुद्दा चलाइएका तीन जना धरौटीमा छुटेका रिहा भएका छन् । त्यस्तै एक जना धरौटी बुझाउन नसकेपछि जेल चलान भएका छन् । नेपाल प्रहरीको केन्द्रीय अनुसन्धान व्यूरो (सिआइबी) ले नक्कली प्रमाणपत्रका आधारमा डाक्टर बनेकालाई ठगी अन्तरगत मुद्दा चलाएकामध्ये मोरङबाट तीन जना आइतबार धरौटीमा छुटेका हुन् । सुनसरीमा एक जना अदालतले माग गरेबमोजिमको धरौटी बुझाउन नसक्दा जेल चलान भएको प्रहरीले जानकारी दिएको छ । 

 

चिकित्सक कार्यरत रहेका संस्था र अवधिका आधारमा आर्जन गरेको आय बराबरीको ठगी गरेको भन्दै बिगो बमोजिमको माग दाबी गरे अनुसार जिल्ला अदालत मोरङबाट डाक्टर लिली सिंह, अब्दुल कलाम र सन्जयकुमार दास धरौटी बुझाएर छुटेका छन् भने परिवार नियोजन कार्यालय इटहरी सुनसरीका प्रमुख डाक्टर मनिष अर्याललाई ३२ लाख २५ हजार रुपैयाँ धरौटी बुझाउन नसकेपछि पूर्वाञ्चल क्षेत्रीय कारागार झुम्का पठाइएको  छ । जिल्ला न्यायाधीश भरत लम्सालको एकल इजलासले अर्याललाई धरौटी माग गरेकोमा बुझाउन नसकेपछि कारागार चलान गरिएको हो ।