बहुसंख्यक नेपालीले भारतलाई मित्रवत् सम्मान र गौरवका साथ हेर्नेगरेका छन् । अहिले भारत संसारमा विशाल प्रजातान्त्रिक देशको रूपमा चिनिन्छ । यस्तो मुलुकको राजदूतावासबाट नेपालमा विदेशी मुद्रा तस्करीजस्तो गम्भीर प्रकृतिको फौजदारी मुद्दामा मुछिएका व्यक्तिलाई उम्काउन नेपालको परराष्ट्र तथा गृह मन्त्रालयमा पत्राचार गरेको समाचारले गम्भीर प्रश्न उत्पन्न भएको छ । भारतीय दूतावासको पत्रका आधारमा धरौटीमा छाडिएको भनिएको अभियुक्त अहिले फरार रहेको छ । अभियुक्तले राखेको धरौटीसमेत फिर्ता गराउन दूतावासबाट प्रयास भएको समाचारमा बताइएको छ ।
भारतले अरू देशका कूटनीतिज्ञले आप्mनो देशमा जस्तो आचरण र व्यवहार गरुन् भने चाहन्छ ठीक त्यस्तै व्यवहार भारतका कूटनीतिज्ञले पनि अरूको देशमा गर्नुपर्छ । सन् २०१२ को फरबरी महिनामा लगभग यस्तै घटना भारतमा भएको थियो ।
हिन्द महासागरमा रहेको इटालियन जहाजको सुरक्षामा तैनाथ इटालियन सैनिकले गोली चलाउँदा भारतको केरलामा दुई जना व्यक्ति मारिए । भारतीय प्रहरीले ती दुवै इटालियन सैनिकलाई पक्राउ गरेर थुनामा राखी मुद्दा चलायो । ती सैनिकलाई भारतस्थित इटालियन राजदूत जमानीमा हिरासतबाट छुटाएर लगे । ती सैनिक भोट हाल्ने निउले इटाली गए । त्यसपछि उनीहरू भारत सरकारले जति कोसिस गरे पनि भारत फर्केनन् । यसको भारतमा कडा विरोध भयो ।
अपराधी भगाएको अभियोगमा राजदूतलाई नै देश छाड्न नदिने आदेश भारतको सर्वोच्च अदालतले दियो । भियना सन्धि र कूटनीतिक उन्मुक्तिको जति दुहाई दिए पनि अदालतको आदेशमा भारत सरकार अडिग रह्यो । अन्ततः इटाली सरकारले ती अभियुक्तलाई भारतीय अदालतमा उपस्थित गराएको थियो । अभियुक्तलाई भारतीय अदालतमा उभ्याएपछि मात्र यो काण्ड साम्य भयो ।
यही घटना स्मरण गरेर नेपालस्थित भारतीय राजदूतबाट पनि इटालीको राजदूतावासले गरेजस्तै अभियुक्तलाई भारतबाट नेपालमा झिकाएर अदालतमा बुझाउने अपेक्षा गरिएको छ । अभियुक्तलाई सफाइ वा सजाय दिने काम अदालतको हो । भारतीय राजदूतले नेपाली जनताको भावना र मित्रताको कदर गरून् ।