काठमाडौं । तेस्रो चरणको स्थानीय तह निर्वाचनअन्तर्गत प्रदेश नं २ मा बिहान ७ बजेदेखि शान्तिपूर्णरुपमा मतदानको सुरू भएको छ । १३६ तहमै निर्वाचन शान्तिपूर्ण रूपमा सुरू भएको हो ।
यसैबीच, एमाले नेता माधवकुमार नेपालले रौतहटको गौर नगरपालिकास्थित जानकी कन्या प्रा.वि केन्द्रबाट मतदान गरेका छन् । यसैगरी राजपा अध्यक्ष मण्डलका राजेन्द्र महतोले सर्लाहीको चन्द्रनगर गाउँपालिकाको वडा नम्बर–२ को दुर्गा खोभारी जनता उच्च मावि मतदान केन्द्रबाट मतदान गरेको निर्वाचन आयोगले जनाएको छ ।
त्यस्तै, निर्वाचन आयोगका प्रमुख आयुक्त डा अयोधिप्रसाद यादवले बिहान ७ः०० बजे राजविराज नगरपालिकाको वडा नं २ आधारभूत विद्यालयमा रहेको मतदान केन्द्रबाट मतदान गरेका छन् ।
उनले सप्तरी सदरमुकामस्थित पुगी मतदान गरेका हुन् । सो केन्द्रमा उनले सर्वप्रथम मतदान गरेको त्यहाँको निर्वाचन कार्यालयले जानकारी दिएको छ ।
कांग्रेस नेता विमलेन्द्र निधि पनि मतदान गर्न गृहजिल्ला धनुषा पुगेका छन् । पूर्वगृहमन्त्रीसमेत रहेका उनले रामेश्वर निधि स्कुलको मतदान केन्द्रबाट मतदान गरेका छन् ।
