काठमाडौं ।  नेपाली कांग्रेसका नेता डा. रामशरण महतले कांग्रेस राजनीतिक परिवर्तन, आर्थिक विकास र हिमाल तराई पहाड सबै भूभागका जनता र विचारलाई सही नेतृत्वका साथ अघि बढाउने सक्कली पार्टी भएको भन्दै आगामी चुनावमा कांग्रेसलाई मत दिन आग्रह गरेका छन् ।

२ नं प्रदेश अन्तर्गत विभिन्न जिल्लामा आयोजित छुट्टाछुट्टै कार्यक्रमहरुलाई सम्वोधन गर्ने क्रममा उनले यस्तो बताएका हुन् । डा. महतले बुधबार बाराको पथलैया, निजगढदेखि सर्लाहीका आधा दर्जन कार्यक्रमलाई प्रमुख अतिथिको रुपमा सम्वोधन गरे ।

सर्लाहीको हरिवन नगरपालिकामा पर्ने चापिनी खोलामा उनले बृक्षारोपण पनि गरे ।

एक भोट दुई रुख अभियान अन्तर्गत खोला तथा नदीको अतिक्रमण नियन्त्रण गर्न स्थानीय कांग्रेसहरुले यो नयाँ अभियान ल्याएका छन । 

कार्यक्रममा डा महतले विसं २०४८ मा कांग्रेसको नेतृत्वमा जननिर्वाचित सरकार गठन भएपछि शुरु गरिएको आर्थिक सुधारको नीतिले हिंसात्मक द्वन्द्व र राजनीतिक अस्थिरताका बीच पनि गौरवलायक उपलब्धिहरु हासिल भएको भन्दै त्यसको फेहरिस्त नै प्रस्तुत गरे ।

उनले भने, “उदार आर्थिक नीतिले आर्थिक गतिविधिहरुको विस्तार हुन गएको हो ।  विसं २०४८ सालमा बार्षिक राजस्व असूली रु १२ अर्ब थियो । विदेशी सहयोगमाथिको निर्भरता झण्डै ३६ प्रतिशत रहेको थियो । अहिले सरकारको वार्षिक राजस्व झण्डै ७ सय ३० अर्बको हाराहारीमा पुगेको छ । यसले गर्दा सरकार बलियो भएको छ र राष्ट्रियतालाई पनि बलियो बनाएको छ ।”

उनले राष्ट्रियता बलियो बनाउने आधार नै आर्थिक समृद्धि भएको बताए ।

कांग्रेसले साधन स्रोत बढाएर कुल विकास बजेटको ७० प्रतिशतभन्दा बढी रकम गाउँ गाउँमा पु¥याएको दाबी गरे ।

उनले भने, “२५ बर्षअघिसम्म पनि ७ हजार किमी सडक बनेकोमा अहिले स्थानीय र सामुदायिक समेत गरी झण्डै ७० हजार किमी सडक बनिसकेको छ भने अधिकांश जिल्लालाई सडकले छोइसकेको छ ।”

नेता डा महतले सक्कली पार्टी र इमानदार प्रतिनिधि कांग्रेसका भएको दाबी गर्दै उनीहरुलाई चुनावमा जिताएर विकास निर्माणमा अघि बढ्न बाराका जनतासमक्ष आग्रह गरे ।
बारास्थित जीतपुर उपमहानगरपालिकाको २ नं र ३ नं वडामा आयोजित भिन्नाभिन्नै चुनावी कार्यक्रमहरुलाई सम्वोधन गर्दै डा महतले यस्तो आग्रह गरेका हुन् ।