साहित्य
काठमाडौं । आह्वान समूहले शनिबार राजधानमिा ‘समकालीन नेपाली साहित्यमा महिला लेखन’ विषयका बहस कार्यक्रम आयोजना गर्यो । बहसमा मुख्य वक्ताको रूपमा प्रा.डा. सुधा त्रिपाठी थिइन् भने सहजकर्ता थिए पत्रकार लक्ष्मण श्रेष्ठ ।
कार्यक्रमा त्रिपाठीले महिलाको लेखनमा गुणात्मकता देखिए पनि सन्तोष मान्नुपर्ने अवस्था अझै पनि नआएको बताइन् । “यसका धेरै कारण छन् । घरपरिवारको बन्धन तथा समाजको संरचनाले गर्दा महिलाहरू टाढा गएर विषय खोज्न सक्दैनन् । त्यसको असर लेखनमा टड्कारो रूपमा आउने गर्छ,” उनले भनिन् ।
पत्रकार श्रेष्ठले पत्रपत्रिकामा महिलाका रचना कमै मात्रामा आउने गरेको प्रसंग निकाल्दा त्रिपाठीले आफूले पठाएका सिर्जना ६ महिना कुर्दा पनि नछापिएको र पटक–पटक फोन गरेर छापिदिन अनुरोध गर्न आफ्नो स्वाभिमानले नदिएको कुरा महिला साहित्यकारहरूले आफूलाई सुनाएको बताइन् ।
डा. अर्चना थापा, उमा सुवेदी र कुमारी लामाको समूह आह्वानले महिलाका विषयलाई केन्द्रमा राखेर हरेक महिना कार्यक्रम गर्ने गरेको छ। आह्वानको यो सातौँ शृंखला हो ।
प्रकाशित मिति: आइतबार, भदौ ५, २०७३ १२:३६
प्रतिक्रिया दिनुहोस्