रौतहट । स्थानीय स्तरमा २० वर्षपछि प्रतिनिधि चयन गर्ने अवसर नजिक आउँदा र तीन पटक सरेर असोज २ मा हुन लागेको निर्वाचनमा सहभागी हुन २ नम्बर प्रदेशका मतदाता आतुर छन् । अन्य जिल्लासँगै सबैभन्दा धेरै नगरपालिका भएको रौतहटबासी पनि नयाँ संरचनामा हुन लागेको निर्वाचनमा सहभागी हुन आतुर देखिन्छन् ।
यसअघिको निर्वाचन बहिस्कार गरेको राष्ट्रिय जतना पार्टी नेपालसहित सबै राजनीतिक दल निर्वाचनमा होमिएपछि र उमेदवारले आफ्नो एजेण्डा लिएर मैदानमा उत्रिएपछि सबैको ध्यान अहिले दुई नम्बर प्रदेशमा केन्द्रीत भएको छ । चुनावी प्रचारको होडबाजी चलिरहँदा मतदाताले कुन पार्टीले कति सिट जित्छ भन्ने अड्कलबाजी र आँकलन पनि गर्न थालेका छन् ।
त्यसैगरी उमेदवारले धेरै महत्वकांक्षी योजना अगाडि सारेर मतदातालाई आफ्नो पक्षमा पार्ने प्रयत्न पनि उत्तिकै गरेको पाइएको छ । तेस्रो चरणको निर्वाचन हुन गइरहेका ८ जिल्ला मध्ये १६ नगरपालिका र २ गाउँपालिका भएको रौतहटका उमेदवार पनि चुनावी प्रचारमा व्यस्त छन् ।
१६ नगरपालिका र २ गाउँपालिका रहेको रौतहटमा १५७ वडाबाट ८ सय २१ जनप्रतिनिधि निर्वाचित हुने मुख्य निर्वाचन अधिकृत लेखनाथ ढकालले जानकारी दिए ।
उनका अनुसार ८ सय २१ प्रतिनिधिका लागि ४ हजार ५ सय २० जनाको उमेदवारी परेको छ । २७७ मतदान स्थल र ४३४ मतदान केन्द्र रहेको रौतहटमा ३५ दल अस्तित्वमा रहेका छन् भने ३ लाख २१ हजार १८ मतदाता रहेका छन् ।
रौतहटमा नेपाली कांग्रेस, एमाले, माओवादी केन्द्र, राजपा, संघीय समाजवादी फोरम, नेपाल लोकतान्त्रिक पार्टी लगायत दलको प्रतिस्पर्धा हुने बताइएको छ ।
मुख्य गरे यी दलकै केन्द्रीय नेतादेखि जिल्लास्तरीय नेताले पनि आफ्नो पार्टीले अधिकांश स्थानमा जित हाँसिल गर्ने दाबी गरिरहेका छन् । प्रायः दलको आँकलन र दाबी भने अनुमानका आधारमा आएको पाइन्छ ।
नेपाली कांग्रेस रौतहट जिल्लाका सभापति कृष्ण यादवले ७५ प्रतिशत स्थानीय तह कांग्रेसले जित्ने दाबी गरे । यद्यपी कांग्रेसले रौतहटको सदरमुकामसमेत रहेको गौरमा उमेदवारी दिन सकेको छैन ।
उमेदवारी प्राविधिक कारणले दिन नसकेको बताउने कांग्रेस जिल्ला अध्यक्ष यादवले पार्टीको जिल्लामा राम्रो अवस्थामा रहेको र जनताले विश्वास गर्ने भएकाले अधिकांश तह जित्ने दाबी गरे ।
त्यस्तैगरी एमाले जिल्ला सचिव लक्ष्मण रेग्मीले सबै तहमा एमालेले उमेदवारी दिएको र ५० प्रतिशत तह जित्दै पार्टी पहिलो बन्ने जिकीर गरे । उनले देशभर एमालेकै लहर छाएको र यो देशको रक्षा गर्ने पार्टी पनि यही भएको जनताले विश्वास गरेको बताए ।
“संविधानको विपक्षमा भोट ग¥यो भनेर मधेसमा आक्रोस छैन,” उनले भने, “सर्वहारा जनता र राष्ट्र रक्षाका लागि एमालेले नेतृत्व गरिरहेको छ । अब, जनताले कसको नियत के भन्ने बुझिसकेका छन् ।”
माओवादी केन्द्रले पनि प्रदेश नं २ मा पहिलो पार्टी बन्ने दाबी गर्दै रौतहटमा समेत अधिकांश स्थानमा जीत हाँसिल गर्ने बताएको छ । माओवादी अध्यक्ष पुष्पकमल दाहाल पनि अहिले २ नम्बर प्रदेशको चुनावी प्रचारमा खटिएका छन् ।
त्यसैगरी राजपाका नेता तथा गौर नगरपलिकाको मेयरका उमेदवार अजय गुप्ताले मधेसी जनताको अधिकारका लागि आफ्नो पार्टीले नेतृत्व गरेका कारण भोटमार्फत मधेसको नेतृत्व गर्ने अवसर दिन आग्रह गरे । उनले रौतहटमा राजपाको राम्रो उपस्थिति रहेको भन्दै धेरै स्थान जित्ने बताए ।
यता संघीय समाजवादी फोरम गौर नगरपालिकाका उमेदवार गौरीशंकर यादवले अधिकार र विकासका लागि पार्टी लागेकाले मत दिएर एजेण्डा बलियो बनाउन आग्रह गरे ।