धनगढी । राप्रपा नेपालका अध्यक्ष कमल थापाले अब कुनै पनि पार्टीसित एकता नगरिने बताएका छन् ।
राप्रपाबाट छुट्टिएर अलग दलको संगठन विस्तारमा रहेका उनले अरूसँग एकता गर्दा विचार, सिद्धान्तमा विकृति र विसंगति बढ्ने भन्दै अब कसैसँग पार्टी एकता नहुने बताए ।
शनिबार कैलालीको धनगढीमा कार्यकर्ता प्रशिक्षण कार्यक्रममा उनले पार्टीभित्रको गलत वैचारिक प्रवृत्ति, विकृति र विसंगति समाधानको प्रयास गर्न खोज्दा सुझाव नमानेपछि अलग दल स्थापना गरेको जिकिर गरे ।
ठूला पार्टीहरूमा वैचारिक विचलन देखापरेको आरोप समेत उनले लगाए । “साम्यवाद, समाजवाद र पुँजीवाद दर्शन हावी हुँदा ठूला दलहरूको विचारमा विचलन आएको छ,” उनले भने, “साम्यवाद, समाजवाद, पुँजीवादको विकल्पमा सम्वर्द्धनवादको दर्शनलाई पार्टीले अघि बढाउनेछ ।”
उनले देशमा प्रत्यक्ष निर्वाचित प्रधानमन्त्री र संसद्बाट निर्वाचित राष्ट्रपतिको व्यवस्था गर्नुपर्ने पुनः दोहोर्याए । केन्द्रमा बलियो सरकार र स्थानीय तहलाई मजबुत बनाउनुपर्ने पनि दोहोर्याए ।