काठमाडौं । नेपाल मेडिकल काउन्सिलले लिने एमबीबीएस तथा बीडीएस चिकित्सक लाइसेन्स परीक्षामा योपटक ३१.८४ प्रतिशत मात्र उत्तीर्ण भएका छन् ।
काउन्सिलले यही जेठ १२, १३ र १४ गते लिएको परीक्षामा एक हजार ४९४ जनाले परीक्षा दिएका थिए । त्यसमध्ये ४७५ जना मात्रै उत्तीर्ण भएको नतिजा काउन्सिलले प्रकाशित गरेको छ ।
काउन्सिलले स्नातक तहका लागि वर्षमा तीनपटक लाइसेन्स परीक्षा लिने गरेको छ । त्यसमध्ये पहिलो चरणमा सहभागी भएका एक हजार ४९४ परीक्षार्थीमध्ये सो संख्यामा उत्तीर्ण भएका हुन् ।
किन कम उत्तीर्ण ?
नेपाल मेडिकल काउन्सिलको पछिल्ला रेकर्डहरूमा एमबीबीएसको लाइसेन्स परीक्षामा निकै कम विद्यार्थी मात्र उत्तीर्ण भएको देखिन्छ । ०७३ सालको दोस्रो चरणको परीक्षामा ५८.२५ प्रतिशत उत्तीर्ण भएका थिए । तर, त्यसपछिका वर्षहरूमा ५० प्रतिशतभन्दा बढी विद्यार्थीले नाम लिकालेको रेकर्ड छैन ।
योपटक अनुत्तीर्ण हुनेमा आठ वर्षअघि भर्ना भएकादेखि तथा अधिकांश पुराना विद्यार्थी रहेका काउन्सिलका रजिष्ट्रार डा. कृष्णप्रसाद अधिकारी बनउँछन् । “जति नयाँ विद्यार्थीले परीक्षा दिए त्यति पास प्रतिशत बढ्ने सम्भावना रहन्छ । यसपटको परीक्षामा ३०० जना मात्रै नयाँ विद्यार्थीले परीक्षा दिएका थिए । त्यसैले पनि कम संख्यामा विद्यार्थी पास भए ।”
तर, कम संख्यामा विद्यार्थी उत्तीर्ण हुनु अर्थात् धेरै विद्यार्थी अनुत्तीर्ण हुनु अस्वाभाविक नभएको डा. अधिकारी बताउँछन् । “विश्वविद्यालय शिक्षाको गुणस्तरअनुसार पास हुनेको यो प्रतिशत ठिकै हो,” उनले भने ।
