काठमाडौं । नेकपा (माओवादी केन्द्र)का अध्यक्ष पुष्पकमल दाहाल प्रचण्डले नेकपा एमाले अध्यक्ष केपी शर्मा ओलीमा अझै अंहकार र दम्भ रहेको बताएका छन् ।
शनिबार प्रतिनिधि सभा बैठकमा बोल्दै अध्यक्ष प्रचण्डले प्रधानमन्त्रीबाट आफैं हट्नु परेको र सातवटै प्रदेश सरकारबाट बाहिरिसक्दा पनि ओलीमा दम्भ र अहंकार नगएको बताएका हुन् । स्थानीय तहको निर्वाचनपछि ओली आत्मसमीक्षा गरेर अगाडि बढ्ने आफूले अपेक्षा गरेको तर उनमा अझै पुरानै अंहकार र दम्भ कायम रहेको संसदको संबोधनबाट देखिएको बताए ।
गठबन्धनले धम्क्र्याएकाले चितवनका जनताले भोट दिएको ओलीले बताएको भन्दै प्रचण्डले भने, “मतदाताप्रति यो भन्दा ठूलो अपमान के हुन्छ ? धम्क्याएको भरमा जनताले भोट दिन्छन् ? यो उहाँको अभिव्यक्ती भरतपुरका जनताको अपमान हो ।”
प्रचण्डले ओली दुबैपटक माओवादीको सहयोगमा प्रधानमन्त्री भएको दाबी गर्दै भने, “अब प्रधानमन्त्री भएर देखाउनुस् । अबको चुनावबाट प्रधानमन्त्री भएर देखाउनुस्, तपाईंलाई एमालेको प्रधानमन्त्री भनेर मानिन्छ ।”