वीरगन्ज । वीरगन्ज महानगरपालिकाको मेयरमा निर्वाचित राजेशमान सिंहले सपथ ग्रहण गरेसँगै वर्षाैदेखि जीर्ण घण्टाघरदेखि माईस्थानसम्मको सडक मर्मत गर्ने पहिलो निर्णय गरेका छन् ।
वर्षाैँदेखि मर्मत सम्भार नहुँदा सास्ती खेपिरहेका नगरवासीलाई परिवर्तनको प्रत्याभूति दिलाउन सिंहले बिहीबार पद बहाली गरेसँगै मुख्य सडकलाई मर्मत गर्ने निर्णय गरेका हुन् ।
वीरगन्जका निवर्तमान मेयर विजयकुमार सरावगीले सडक विभागअन्तर्गत पर्ने उक्त सडक निर्माण गर्न आफ्नो अधिकारक्षेत्र भित्र नरहेको बताउँदै आएका थिए । तर, सपथ लिएकै दिन नवनिर्वाचित मेयर सिंहले उक्त सडकलाई मर्मत गर्ने निर्णय गरेका छन् ।
त्यसैगरी मेयर सिंहले महानगरभित्र बसोबास गर्ने १० हजार ९ सय २४ घरधुरीको घरेलु प्रयोजनका लागि मासिक ३० युनिटसम्म विद्युत खपत गर्ने प्रयोगकर्ताको न्यूनतम शुल्क महानगरले नै भुक्तानी गर्ने निर्णय पनि गरेका छन् ।
पाँच दलीय गठबन्धनले जारी गरेको घोषणा पत्रमा उल्लेख भएबमोजिम बढीमा ३० युनिटसम्म बिजुली खपत गर्ने प्रयोगकर्ताको महशुल महानगरले नै भुक्तानी गर्ने भएको हो । यद्यपि, ३० युनिटभन्दा बढी खपत गर्ने सेवाग्राहीले सम्पूर्ण शुल्क आफै तिनुपर्ने हुन्छ । योजना ३० युनिटसम्म विद्युत् खपत गर्ने सेवाग्राहीको लागि मात्र भएको निर्णयमा स्पष्टसँग खुलाइएको छ ।
त्यस्तै, महानगरभित्र रहेका ४ सय ७० वटा कृषि (सिँचाइ)मा लाग्ने विद्युतकाे सम्पूर्ण शुल्क भुक्तानीको दायित्व पनि महानगरले नै लिने सिंहले निर्णय गरेका छन् । कृषकहरूको उत्पादन क्षमता वृद्धि गर्दै उनीहरूलाई प्रोत्साहन गर्न उक्त निर्णय गरिएको सिंहले बताए ।
घेरलु र कृषि बाहेक व्यावसायिक, मनोरञ्जनात्मक र अन्य प्रायोजनका लागि मिटर लिएकाहरू भने उक्त योजनाबाट लाभान्वित हुने छैनन् ।
सपथ ग्रहण गरेको २४ घण्टाभित्रै परिवर्तनको प्रत्याभूति गराउने सिंहको प्रतिबद्धता अनुरूप नगरवासीले अब विद्युत महशुल र सिँचाई मिटरको शुल्क तिर्न नपर्ने भएको छ । यी सबै निर्णय आउँदो साउन १ गतेदेखि कार्यान्वयन हुने जनाइएको छ ।