काठमाडौं ।  एनआईसी एसिया बैंकको नायब प्रमुख कार्यकारी अधिकृतमा सन्तोषकुमार राठी नियुक्त भएका छन् । यही जेठ ८ गते बसेको बैंक सञ्चालक समितिको बैठकले राठीलाई बैंकको नायब प्रमुख कार्यकारी अधिकृतमा नियुक्त गरेको हो ।

उनी बैंकको सहायक प्रमुख कार्यकारी अधिकृतका रूपमा कार्यरत थिए । नेपाल राष्ट्र बैंकले जारी गरेको एकीकृत निर्देशन–२०७८ को इ.प्रा.निर्देशन नं. ६/०७८ को बुँदा नं. ७ (१) (छ) मा भएको व्यवस्थाबमोजिम बैंकको सञ्चालक समितिले उनलाई आउँदो साउन १ गतेदेखि लागु हुने गरी नियुक्त गरेको जनाएको छ ।

०६४ मंसिर १९ मा तत्कालीन बैैंक अफ एसियाको विराटनगर शाखाको शाखा प्रबन्धकको जिम्मेवारीबाट बैंकमा प्रवेश गरेका राठीले बैंकको विराटनगर प्रादेशिक कार्यालयको प्रमुख, विभिन्न इकोसिस्टमहरूको प्रमुख र बैंकको सहायक प्रमुख कार्यकारी अधिकृत हुँदै नायब प्रमुख कार्यकारी अधिकृत भएका हुन् ।

राठीले समग्र बैंक व्यवस्थापन, जोखिम व्यवस्थापन, मानव संशाधन व्यवस्थापन, व्यवसाय विस्तार तथा विविधिकरणलगायत विभिन्न रणनीतिक क्षेत्रमा विशेष दक्षता हासिल गरेका छन् ।