काठमाडौं । कैलालीमा नेपाली सेना भूतपूर्व सैनिक सम्मेलन–२०७८ कार्यक्रम सम्पन्न भएको छ । नेपाली सेना कल्याणकारी बोर्डको समन्वय तथा संयोजकत्वमा सेनाबाट निवृत्तिभरणमा रहेका भूपू सैनिक तथा तीनका एकल महिलाहरूको सहभागितामा भएको कार्यक्रममा प्रधान सेनापति प्रभुराम शर्माको प्रमुख आतिथ्यतामा सम्पन्न भएको हो ।
सम्मेलनलाई सम्बोधन गर्दै प्रधान सेनापति शर्माले सेनाको संस्थागत मूल्य र मान्यताहरूलाई जीवन्त राख्न अवकाश प्राप्त अग्रज सैनिकहरूले गरेको निःस्वार्थ सेवा तथा भूमिकाको प्रशंसा गरे ।
कार्यक्रममा, कञ्चनपुर जिल्ला निवासी जेष्ठ भूतपूर्व सैनिक, ९३ वर्षका हुद्धा खड्ग सिंह खत्री (अ.प्रा.) र कालीजंग गण (तत्कालीन कालीजंग गुल्म) बाट अवकास प्राप्त स्वर्गीय जमदार घुमसिंह कठायत (अ.प्रा.) को श्रीमती, १०६ वर्षकी जेष्ठ एकल महिला श्रीमती भद्रकाली कठायतलाई सम्मान गरिएको थियो ।
कार्यक्रममा कैलाली र कञ्चनपुर जिल्लाहरुमा बसोबास गर्ने करीब २३०० जना सेनाका भूतपूर्व सैनिक तथा परिवारजनको सहभागिता रहेको थियो ।