लन्डन । अदालतले बेलायतको एउटा विश्वविद्यालयले एकजना लेक्चरलाई जागिरबाट हटाएर अन्याय गरेको ठहर छ । अदालतले निकालिएकी लेक्चरलाई क्षतिपूर्तिस्वरूप एक लाख पाउन्ड रकम दिन पनि आदेश दिएको छ ।
डा. एन्नेटे प्लाउटले २९ वर्षदेखि एक्जेटर विश्वविद्यालयमा पढाउँदै आएकी थिइन् । विश्वविद्यालयको भौतिकशास्त्र विभागसँग आबद्ध उनी आफूलाई आवाज ठूलो भएकै निहुँमा जागिरबाट निकालिएको दाबीसहित अदालत गएकी थिइन् ।
विश्वविद्यालय प्रशासनले आफूमाथि दुर्व्यवहार गरेको तथा सोही कारण आफूले स्वास्थ उपचारमा समेत खर्च गर्नुपरेको गुनासो गरेकी थिइन् । उनले आफ्नो स्वर जन्मजात नै चर्को भएको र यो आफूले युरोपेली यहुदी पृष्ठभूमिबाट आएकाले विरासतकै रूपमा प्राप्त गरेको पनि बताएकी छन् ।
द गार्डियनकाअनुसार उनले आफू महिला भएकाले चर्को आवाज नसुहाउने भन्ने विश्वविद्यालयको लैंगिक पूर्वाग्रहपूर्ण मानसिकताको शिकार भएको दाबी गरेकी छन् । साथै उनी विश्वविद्यालयको भौतिकशास्त्र विभागमा प्रवेश गर्ने पहिलो महिलाको प्राज्ञको रूपमा पनि उनले छुट्टै पहिचान बनाउन सफल भएकी थिइन् ।
द मिररकाअनुसार डा. प्लाउटको गुनासोबारे प्रतिक्रिया दिने क्रममा विश्वविद्यालयले भने उनले विद्यावारिधिका दुईजना विद्यार्थीमाथि उनले गरेको व्यवहारलाई लिएर उनलाई कारबाही गरिएको जनाएको छ ।
साथै विश्वविद्यालयले उनको बर्खास्तगीसँग उनको पारिवारिक पृष्ठभूमि वा लिंगसँग कुनैपनि सरोकार नभएको पनि स्पष्ट पारेको छ । तर, रोजगार सम्बन्धी न्यायालयले भने उनलाई अनियमित तरिकाले बर्खास्ती गरिएको बताउँदै उनलाई क्षतिपुर्ति स्वरूप तोकिएको रकम उपलब्ध गराउन आदेश दिएको छ ।
एन्डीटीभीबाट ।