काठमाडौं । गृहमन्त्री बालकृष्ण खाँणले पूर्वाञ्चल विश्वविद्यालय (पीयू)ले लिइरहेको बीएएलएलबी चौथो वर्षको परीक्षालाई निरन्तरता दिन नदिनेबारे विद्यार्थीसँग कुराकानी गरेका छन् ।
बीएएलएलबी पहिलो, दोस्रो र तेस्रो वर्षमा उत्कृष्ट अंक ल्याएकामध्ये प्राञ्जली कडेल र अञ्जली तिवारीलाई बिहीबार टेलिफोन गरेर गृहमन्त्री खाणले जारी परीक्षा सञ्चालन गरिरहने कि केही समय स्थगन गर्ने भनेर सोधेका हुन् ।
विश्वविद्यालयले पुस २९ गतेबाट सुरु गरेको बीएएलएलबी चौथो वर्षको परीक्षामध्ये बुधबार भएको परीक्षामा कोभिड–१९ संक्रमित र संक्रमणमा नभएकालाई एउटै कोठामा राखिएको भन्दै परीक्षर्थीहरूले शान्तिपूर्ण धर्ना दिएका थिए । त्यो धर्नामा प्रहरीले धरपकड गरेको भन्दै विद्यार्थीहरूको टोली बिहीबार गृहमन्त्री खाणलाई भेट्न मन्त्रालय आएको थियो ।
काठमाडौं स्कुल अफ ल भक्तपुरमा अध्ययनरत साइरस शर्मा, जीवन शर्मा, रश्मी रेग्मी, अर्नव चौधरी, अमृत मिश्रलगायतका विद्यार्थीहरू मन्त्री खाँणलाई भेट्न मन्त्रालयमा आएका थिए ।
उनीहरूलाई मन्त्री खाणले पढ्नमा ‘ट्यालेन्ट’ विद्यार्थीले परीक्षा होस् भन्ने चाहना राखेको तर परीक्षको तयारी नगरेका विद्यार्थीले परीक्षा स्थगनको माग राखेको भन्ने कुरा आएकाले यथार्थ के हो भनेर सोधेका थिए ।
त्यसपछि विद्यार्थीहरूले बीएएलएलबी पहिलो, दोस्रो र तेस्रो वर्षमा उत्कृष्ट अंक ल्याउने विद्यार्थीले पनि परीक्षा नदिएको बताएका थिए ।
उनीहरूको त्यो जवाफपछि मन्त्री खाँणले पहिलो हुने विद्याथी कडेल र तिवारीको मोबाइल नम्बर मागेर फोन गरेका हुन् ।
मन्त्री खाणसँग टेलिफोनमा कडेलले परिवारसहित आफू कोभिड–१९ संक्रमणमा रहेको र संक्रमणमा रहेका विद्यार्थीले छुट्टै बसेर परीक्षा दिने व्यवस्था विश्वविद्यालय र परीक्षा सेन्टर भएको क्याम्पसले नगरेको भन्दै केही समय स्थगन गर्दा उपयुक्त हुने सुझाएकी थिइन् ।
अर्की विद्यार्थी तिवारीले पनि परीक्षा केही समय स्थगित गरेर संक्रमण वृद्धिको उच्चदर केही रोकिएपछि गर्दा उपयुक्त हुने सुझाव दिएकी थिइन् ।
गृहमन्त्रीलाई भेट्न आएका शर्माले बुधबार चौथो वर्षका परीक्षा दिने १५० जनामध्य २७ जनाले मात्र परीक्षा दिएका बताए ।
गृहमन्त्री खाणले आफूले सबै विद्यार्थीले स्थास्थ्यका मापदण्ड पालना गरेर परीक्षा दिने वातावरण निर्माण गर्न पहल गर्ने बताएका थिए ।
