चितवन । नेकपा एमाले चितवनले निर्वाचन आयोगको निर्णयविरुद्ध सर्वोच्च अदालतमा जानु नै पार्टीको लागि घाटा भएको बताएको छ ।

नेकपा एमालेले चितवनमा सोमबार बिहान पत्रकार सम्मेलन गर्दै यस्तो बताएको हो ।

पत्रकार सम्मेलनमा मेयरमा पराजित उमेदवार देवी ज्ञवालीले निर्वाचन आयोगको निर्णय हुनासाथ निर्वाचन भएको भए पनि अहिलेको परिणाम नआउने बताए ।
उनले त्यस्तो अवस्थामा नेकपा एमाले नै विजयी हुने दाबी समेत गरे ।

“निर्वाचन आयोगको निर्णयविरुद्ध सर्वोच्चमा जाँदा हामीलाई केही घाटा लागेको हो । त्यो नभएको भए भिन्न परिणाम आउँथ्यो । सर्वोच्चमा जाँदा हार बेहोर्नुपर्यो ।”
उनले राज्यसत्ताको चरम दुरुपयोग गरेर आफूलाई पराजित गराइएको समेत दाबी गरे ।

“राज्यसत्ताको चरम दुरुपयोग भयो,” उनले भने, “विकासका नाममा करोडौं रकमान्तर गरियो । प्रहरीकै स्कर्टिङमा पैसा बाँड्ने काम गरियो । मौन अवधीमा पनि घर घर पुगेर रकम बाँडियो । मैले पद हारे पनि राजनीति हारेको छैन । चितवन र भरतपुरको विकासमा म सधैँ लाग्छु ।”

पत्रकार सम्मेलनमा नेकपा माओवादी केन्द्रको निर्देशन, कांग्रेसका केही जिल्लास्तरिय नेताको सहमति र राज्यसत्ताको सहयोगमा जेठ १४ गते मतपत्र च्यातिएको आरोप लगाइएको थियो ।

यसको सहयोगमा माओवादीका दुई कार्यकर्ता द्रोण शिवाकोटी र मधु न्यौपानेले मतपत्र च्यातेको जानकारी गराइएको थियो ।

एमाले जिल्ला अध्यक्ष कृष्णभक्त पोखरेलले पत्रकार सम्मेलनमा जेठ १४ गते राति मतपत्र नच्यातिएको भए २६० मतले एमालेले जित्ने पनि दाबी गरे ।

सरकार, निर्वाचन आयोग र सर्वोच्चको योजनामा पुनः निर्वाचन गर्ने नाटक गरेर रेणु दाहाललाई जिताइएको एमालेको दाबी छ ।

“सत्ताको आडमा करोडौं बाँडिएको छ,” एमालेले भनेको छ, “नक्कली सवारी पास बनाएर कार्यकर्ता ओसारिएको छ । त्यसैले मतपरिणाम स्वभाविक मान्न सकिन्न । परिणाम जस्तो भए पनि जिम्मेवार भएर अघि बढ्नेछौं ।”