काठमाडौं । आन्तरिक राजस्व विभागका निलम्बित महानिर्देशक चुडामणि शर्मा पक्षधर वकिलहरूले विश्वको इतिहासमा कतै नभएको धरौटी रकम मागिएको बताएका छन् । गैरकानुनी रूपमा थुनामा राखेको भन्दै शर्माकी श्रीमती कल्पना उप्रेतीले थुनामुक्त गर्न माग गर्दै सर्वोच्चमा दायर रिटमा वकिलहरूले बहस गरेका हुन् । शर्मा पक्षका वकिल ललित बस्नेतले बेल सिद्धान्त दुरुपयोग भएको समेत जिकिर गरे ।

शर्माको बन्दीप्रत्यक्षिकरण रिटको सुनुवाइ आइतबार पनि हेर्दाहेर्दैमा साउन २५ गतेको लागि राखिएको छ । पाँचौ पटक बेन्च बस्दा पनि उक्त मुद्दाको टुगो भने लाग्न सकेको छैन । निवेदक पक्षका बस्नेतले शर्मालाई पुलिसको हिरासतमा पठाउनु ‘घरबाट जंगल पठाएसरह न्यायसंगत नभएको’ भनी बहस गरे ।

सरकारी वकिलहरुले भने अख्तियारले अनुसन्धान गर्न पाउनुपर्छ भन्दै बहसमा उत्रेका थिए ।

सरकारी पक्षको बहस भने आज सकिएको छ । अख्तियारको तर्फबाट अधिवक्ता परशुराम कोइराला र चेतनाथ घिमिरेले बहस सकेपछि निवेदक पक्षका अधिवक्ता ललित बस्नेतले प्रतिउत्तर तथा खण्डन गरेका थिए ।

१ नम्बर इजलासमा न्यायाधीश दीपकराज जोशी, दीपकुमार कार्की, केदारप्रसाद चालिसे, सारदाप्रसाद घिमिरे र अनिलकुमार सिन्हाको पाँच सदस्यीय टोलीले निवेदक पक्षका वकिललाई भोलि सोमबार बहसनोट पेश गर्न पुनः आदेश गरेको छ ।

पत्नीद्वारा दायर रिटमा शर्मासँग अमानवीय ढंगबाट धरौटी रकम माग गरिएको भन्दै अख्तियारलाई कर फरछ्यौट आयोगले गरेको कामकारवाही प्रति अनुसन्धान गर्ने अधिकार नभएको उल्लेख छ ।

रिटमा अख्तियार दुरुपयोग अनुसंधान आयोग, विशेष अदालत र अनुसन्धान अधिकृत राजन अधिकारीलाई विपक्षी बनाइएको छ ।