काठमाडौं । भरतपुर महानगरमा कांग्रेस समर्थित माओवादी उमेदवार रेणु दाहालले २०३ मत अन्तरले एमाले उमेदवार देवी ज्ञवालीलाई हराइन् ।
पहिलो चरणमा निर्वाचन भएको भरतपुर महानगर जित्ने बलियो आधारहरु हुँदाहुँदै कांग्रेस सभापति शेरबहादुर देउवाले मुख्य निर्वाचन अधिकृतलाई चिठ्ठी पठाएर कांग्रेस टिकट दिइसकेका कांग्रेस उमेदवार दिनेश कोइरालाको उमेदवारी फिर्ता गराए ।
आलोपालो सरकारको नेतृत्व गर्ने सहमतिअनुसार चुनावपछि नेतृत्व लिन हतारिएका देउवा कार्यकर्तालाई चिढाएरै भए पनि भरतपुरमा कार्यकर्ताको इच्छाविपरित माओवादीसँग तालमेलको निर्णय गरेका थिए ।
पार्टीको जनाधार कमजोर भएको भरतपुरमा रेणु दाहालका बुबा तथा नेकपा माओवादी केन्द्रका अध्यक्ष एवम् तत्कालिन प्रधानमन्त्री पुष्पकमल दाहालले चलाखीपूर्वक कांग्रेससँग तालमेल गर्ने प्रस्ताव गरेका थिए ।
आफूलाई प्रधानमन्त्री पद हस्तान्तरण गर्न मुखैमा पुगेका र पोखरालगायत ठाउँमा कांग्रेस उमेदवारलाई समर्थन गर्ने आश्वासन पाएपछि देउवाले कार्यकर्ता र अन्य नेताको कुरा भन्दा दाहालको प्रस्ताव स्वीकार गरेका थिए ।
कांग्रेसले सहज रुपमा जित्नसक्ने भरतपुरमा उपमेयर लिएर आफ्नोभन्दा झण्डै आधा मत भएको माओवादीलाई समर्थन गर्नुपर्दा कांग्रेस कार्यकर्ता तथा शुभचिन्तक असन्तुष्ट बनेका थिए ।
त्यही असन्तुष्टिका कारण वडा तहदेखि केन्द्रसम्म आफ्नो मुख्य प्रतिस्पर्धी दल नेकपा एमालेका उमेदवार ज्ञवालीलाई समेत करिब ६ हजार कांग्रेस कार्यकर्ताले भोट दिए ।
कांग्रेस कार्यकर्ताको चुनाव जित्ने दाबीलाई वडा तहमा पार्टीले पाएको मतले समेत प्रमाणित गरिदिएको छ ।
कसरी ?
भरतपुरको अन्तिम नतिजाअनुसार रेणु दाहालले ४३ हजार १२७ मत प्राप्त गरिन् भने एमाले उमेदवार ज्ञवालीले ४२ हजार ९२४ प्राप्त गरे ।
मेयरमा माओवादीलाई समर्थन गरेको कांग्रेसले वडामा ल्याएको मत एमालेको भन्दा धेरै छ । कांग्रेसका २९ वडाकै अध्यक्षले प्राप्त गरेको मत ३८ हजार १२७ छ भने एमालेका २९ वडाकै अध्यक्षले प्राप्त गरेको मत ३७ हजार १९५ छ ।
यो तथ्यांकलाई हेर्दा कार्यकर्ता असन्तुष्ट हुँदाहुँदै पनि एमालेले भन्दा कांग्रेसले ९३२ मत बढी पाएको छ । जुन कांग्रेसको तर्फबाट मेयरमा उमेदवार भएको भए विजयी हुने बलियो आधार हो भने कार्यकर्ताको दाबी पनि सहि सावित भएको हो ।
माओवादीको तर्फबाट २९ वटा वडामा अध्यक्षका उमेदवारले प्राप्त गरेको मत २१ हजार २०८ मत हो । यद्यपी वडा नं १९ मा भने वडामा कांग्रेस उमेदवारलाई समर्थन गरेकाले माओवादी उमेदवारले ५७ मत मात्रै प्राप्त गरेका थिए ।
कांग्रेस, एमाले र माओवादीका २९ वटा वडा अध्यक्षका उमेदवारले प्राप्त गरेको मतका आधारमा विश्लेषण गर्दा मेयर बन्न सफल माओवादी उमेदवार दाहालले कांग्रेसको २१ हजार ९१९ मत प्राप्त गरिन् । त्यस्तै एमाले उमेदवार देवी ज्ञवालीले कांग्रेसको ५ हजार ७२९ मत पाए ।
मतपत्र च्यात्दा रेणुको जित !
वैशाख ३१ गते भएको निर्वाचनमा ३ हजार ३१४ मत खसेको वडा २० को मतगणना बाँकी थियो । अर्को २ हजार ८८७ मत खसेको वडा १९ को १८ सय मत गणना भइसक्दा एमाले उमेदवार देवी ज्ञवालीले उक्त वडामा रेणुलेभन्दा ६५ मत मात्रै कम पाएका थिए । जुन तथ्यांकले मतपत्र नच्यातिएको भए वडा १९ मा उनले १०० देखि १२० मत मात्रै रेणुको भन्दा कम पाउँथे ।
तर, मतपत्र च्यातेर साढे २ महिनापछि भएको निर्वाचनमा ५६३ मत रेणुको भन्दा कम पाउँदा उनी २०३ मतले पराजित भए ।
यसलाई अझ स्पष्ट बनाउन वडा नं २० को मत हेरौं । वडा २० मा दाहालले ज्ञवालीले भन्दा ४२४ मत बढी ल्याइन् । यसमा वडा नं १९ को छोडेर तथ्यांक निकाल्दा ज्ञवाली ३६० मतले अगाडी हुने थिए । यसमा मतपत्र नच्यातिएको अवस्थामा देवीले कम्तिमा २०० देखि २५० मतले दाहाललाई पराजित गर्थे ।
यसरी हेर्दा माओवादी कार्यकर्ताले मतपत्र च्यातेर पुनः मतदान हुँदा दाहाल विजयी हुन सफल भएको आरोपलाई तथ्यांकले समेत पुष्टी गरेको छ ।
एमालेको भरतपुर राजनीति सहज
सत्ता घटक दुई दलको गठबन्धनलाई चुनौती दिँदै जेठ १४ मै जित नजिक पुगेका देवी ज्ञवालीको हारलाई ‘षड्यन्त्र’ देखेको एमालेलाई बलियो बनाइदिएको छ । उसले एमाले उमेदवारले जित्ने भएपछि मतपत्र च्यातिएको र राज्यसंयन्त्रको गलत प्रयोग गरेर निर्वाच जितेको भन्ने आरोप लगाउँदै भरतपुरमा आगामी चुनावमा समेत एजेण्डा बनाउने बताएको छ ।