काठमाडौं । भरतपुर महानगरपालिका वडा नम्बर १९ को मतगणनाका क्रममा जेठ १४ गते राति मतपत्र च्यातिएपछि पुनः भएको मतदानको मतपरिणाम सार्वजनिक भएको छ ।
जसमा नेकपा माओवादी केन्द्रकी उमेदवार रेणु दाहाल विजयी भएकी छन् ।
भरतपुर महानगरपालिका वडा नम्बर १९ को मतगणनाका क्रममा जेठ १४ गते पौने १२ बजे राति माओवादीका दुई कार्यकर्ताले मतपत्र च्यातेका थिए । मतपत्र च्यातिएपछि मतगणना स्थगित गरिएको थियो ।
पछि अनुगमन गर्दा ९० मतपत्र च्यातिएको पाईएको थियो । सोही दिनबाट भरतपुरमा मतगणना रोकिएको छ । च्यातिएको मतपत्र पछि अनुसन्धान गरी निर्वाचन आयोगले पुनःमतदानको निर्णय गरेपछि एमालेले मतगणनाको माग गर्दै सर्वोच्चमा रिट दायर गरेको थियो ।
भरतपुर महानगरपालिका वडा नं. १९ मा पुनः मतदान गराउने निर्वाचन आयोगको निर्णयविरुद्ध सर्वोच्च अदालतमा सोही वडाका एमालेका स्थानीय नेता गुञ्जमान विक र अधिवक्ता तुलसीराम पाण्डेले रिट दायर गरेका थिए ।