चितवन । चितवनको भरतपुर महानगरपालिकामा नेकपा माओवादी केन्द्र र कांग्रेसकी साझा उमेदवार रेणु दाहाल विजयी भएकी छन् ।
उनले नेकपा एमालेका उमेदवार देवी ज्ञवालीलाई पराजित गर्दै मेयर पदमा बाजी मारेकी हुन् ।
भरतपुर वडा नम्बर १९ को मतगणना भैरहेको बेला जेठ १४ गते मध्येराति नेकपा माओवादीका दुई कार्यकर्ताले मतपत्र च्यातेपछि भरतपुरको चुनावी मोड बदलिएको थियो ।
त्यसबेलासम्म नेकपा एमालेका उमेदवार देवी ज्ञवालीको जित लगभग पक्का जस्तै देखिएको थियो ।
तर सुनियोजित रुपमा मतपत्र च्यातिएपछि निर्वाचन अधिकृतको कार्यालयले मतगणना स्थगित गरेर निर्वाचन आयोगमा पठाएको थियो ।
अनुसन्धानपछि निर्वाचन आयोगले भरतपुरमा पुनः मतदान गर्ने निर्णय गरेपछि नेकपा एमालेका दुई कार्यकर्ता सर्वोच्च अदालतमा पुगेका थिए ।
उनीहरुले निर्वाचन आयोगको निर्णय खारेज गर्दै पुनः मतगणनाको माग गरेका थिए ।
तर सर्वोच्च अदालतले पनि निर्वाचन आयोगको निर्णयलाई सदर गर्दै पुनः निर्वाचन गराउन सक्ने फैसला गरेपछि शुक्रबार पुनः मतदान भएको थियो ।
पुनः मतदान हुँदा यसअघि रेणु दाहाललाई मतदान नगरेका कांग्रेस कार्यकर्ताको मत उनले प्राप्त गर्न सफल भइन् । जुन मत यसअघि देवी ज्ञवालीलाई परेको थियो ।
त्यसले गर्दा पनि उनलाई जित सहज भयो ।