काठमाडौं । चितवनको भरतपुर महानगरपालिकामा जारी मतगणमा माओवादी केन्द्रले मतान्तर घटाउँदै लगेको छ । एमाले अहिले १७० मतले मात्रै अगाडि छ ।  वडा नम्बर १९ को मतगणना सकिएपछि सुरु भएको २० नम्बर वडाको मतगणनामा ४०२ मतगणना गर्दा मतान्तर १७० मा घटेको हो । २० नम्बरमा ३ हजार ३०२ मत खसेको छ । 

माओवादी केन्द्रकी मेयरकी उमेदवार रेणु दाहालको मत ४१ हजार ८९९ छ भने एमालेका देवीप्रसाद ज्ञवालीले ४२ हजार ६९ मत प्राप्त गरेका छन् । 

१९ को मतगणना सकिँदा एमाले २२१ मतले अगाडि थियो । १९ मा २ हजार ८७० मत खसेकोमा माओवादी केन्द्रकी मेयरकी उमेदवार रेणु दाहालले १ हजार ५२९ मत र एमालेका देवीप्रसाद ज्ञवालीले ९६६ मत प्राप्त गरे । 

वडा नम्बर १८ को गणना सकिदासम्म ज्ञवाली माओवादी कांग्रेस गठवन्धनकी उमेदवार रेणु भन्दा ७८४ मतले अगाडि थिए ।

गत जेठ १४ गते वडा नम्बर १९ को मतगणना भइरहेका बेला माओवादी केन्द्रका दुई कार्यकर्ताले मतपत्र च्यातेपछि जिल्ला निर्वाचन अधिकृतको कार्यालयले मतगणना सम्बन्धी सबै प्रक्रिया स्थगित गरेको थियो ।

निर्वाचन आयोगले उक्त घटनाको छानविनपछि पुनः मतदान गर्ने निर्णय गरेपछि नेकपा एमालेका दुई स्थानीय नेताले सर्वोच्च अदालतमा पुनः मतदान गर्ने आयोगको निर्णय रोक्न माग गर्दै रिट दायर गरेका थिए । रिट निवेदनको सुनुवाई गर्दै सर्वोच्चले नै मतदान गराउन आदेश दिएपछि शुक्रबार पुनः मतदान भएको थियो ।

भरतपुर १९ मा तीनवटा मतदान स्थलका ६ वटा केन्द्रमा मतदान सम्पन्न भएको थियो । ३ हजार ८९७ मतदाता रहेको भरतपुर १९ मा ७५.५८ प्रतिशत (२ हजार ८७० ) मत खसेको छ । यो यस अगाडि खसेको मत भन्दा ५७ मत कम हो । 

वडा नम्बर १८ को गणना सकिदासम्म देवी ज्ञवाली माओवादी कांग्रेस गठवन्धनकी उमेदवार रेणु दाहालभन्दा ७८४ मतले अगाडि थिए । २९ वटा वडा रहेको भरतपुरको नतिजा आज साँझसम्म आउने बताइए पनि नआउने भएको छ । आइतबार बिहामनसम्म आउने बताइएको छ ।