काठमाडौं । राष्ट्रिय जनता पार्टी असोज २ गतेका लागि तोकिएको निर्वाचनमा सहभागी हुने कि नहुने भन्ने आन्तरिक छलफलमा जुटेको छ ।

पार्टी कार्यालय बबरमहलमा बुधबारदेखि जारी पदाधिकारी बैठकमा आगामी निर्वाचनमा सहभागी हुने कि नहुने भन्ने बारेमा छलफल भैरहेको एक नेताले जानकारी दिए ।
आन्तरिक विवादमै रहेको राजपामा चुनावमा जाँदा आवश्यक खर्च कसरी जोहो गर्ने भन्ने विषयमा पनि अनौपचारिक छलफल भएको एक शीर्ष नेताले बताए ।

राजपाको अहिले चलिरहेको पदाधिकारी बैठकमा असोजको लागि तोकिएको तेस्रो चरणको स्थानीय तह निर्वाचनमा जानुपर्ने दबाब बढिरहेको ती नेताको भनाई छ तर अध्यक्ष मण्डल भने खर्चको पिरले चुनावमा गइहाल्ने परिस्थितिमा नदेखिएको उनले बताए ।

“अहिले हामी चुनावमा गयौं भने जनताले हामीलाई भोट दिने अवस्था पनि छैन किनकी संविधान संशोधन हाम्रो मुख्य एजेण्डा हो । हामीले उठाएको एजेण्डा पारित पनि भएको छैन । संविधान संशोधन चुनावअघि हुने अवस्था पनि देखिँदैन । अहिले चुनावमा जाँदा ठूला दलसँग प्रतिष्पर्धा गर्न हामीसँग प्रशस्त पैसा पनि छैन । सरकारमा नभएकाले हामीसँग कुनै मन्त्रालय पनि छैन,” ती नेताले बाह्रखरीसँग कुरा गर्दै भने ।

राजपा संचालनको खर्च अहिले अध्यक्ष मण्डलमा रहेका नेताहरुले नै बेहोरेको उनले बताए । तर राजपाका नेता केशव झाले अहिले चुनावमा जाने कि नजाने भन्ने निर्णय नै नभएकाले खर्चको कुरै नभएको बताए ।

उनले पदाधिकारी बैठकमा पनि खर्चका बारेमा कुरै नभएको जानकारी दिए ।