काठमाडौं । वरिष्ठ अधिवक्ता बद्रीबहादुर कार्कीले न्यायालय भ्रष्ट हुन नदिन भ्रष्ट व्यक्तिलाई बिदाइ गर्नुपर्ने बताएका छन् ।

शुक्रबार सर्वोच्च अदालत परिसरमा नेपाल बार एसोसिएसनद्वारा आयोजित कोणसभामा उनले व्यक्ति भ्रष्ट हुन सक्ने तयार संस्थालाई जोगाउनुपर्नेमा जोड दिए ।

“व्यक्ति कहिलेकाहीँ भ्रष्ट हुनसक्छ । तर, संस्था भ्रष्ट हुन सक्दैन । प्रधानन्यायाधीश भ्रष्ट हुन सक्छ, अहिले भएको छ,” उनले भने, “तर, न्यायालय भ्रष्ट हुन सक्दैन । न्यायालय भ्रष्ट हुन नदिन भ्रष्टलाई बिदाइ गर्नुपर्छ ।”

प्रधानन्यायाधीश चोलेन्द्रशमशेर जबरा ‘धनयुद्धको बल’मा पदमा रहिरहेको उनको भनाइ छ ।

“इजलास चलाउन सक्नु हुन्न, तर आफ्नो कुर्सी समातेर बसिरहनुभएको छ । किनकि, उहाँलाई लाज छैन, नैतिकता पनि उहाँसँग बाँकी छैन,” उनले भने, “जनयुद्ध र जनआन्दोलनभन्दा धनयुद्ध बलियो हुँदो रहेछ । यो धनयुद्धकै बलमा चोलेन्द्र कुर्सीमा छन् । नेताहरू बोल्न सक्दैनन् । त्यही धनले उहाँहरूको मुख बन्द गरिदिएको छ ।”