काठमाडौं । फ्रेन्च लिग वानको क्लब पेरिस सेन्ट जर्मेन (पीएसजी) बराबरीमा रोकिँदा च्याम्पियन्स लिगको समूह ‘ए’ मा म्यानचेस्टर सिटीले क्लब ब्रुगलाई ४–१ ले हराउँदै शीर्ष स्थानमा उक्लिएको छ । 

इङ्लिस प्रिमियर लिगको क्लब सिटीले गएराति घरेलु मैदानमा सहज जित निकाल्दा स्ट्राइकर रहिम स्टर्लिङले गोलको खडेरी तोडे । उनले वैकल्पिक खेलाडीका रुपमा मैदान छिरेका स्टर्लिङले ७२औं मिनेटमा गोल गरेका थिए । स्टर्लिङलेअगस्ट पछि गरेको यो पहिलो गोल हो । 

त्यसअघि सिटीले १५औं मिनेटमा फिल फोडानको गोलबाट अग्रता लिएको थियो । तर, त्यसको दुई मिनेट वित्न नपाउँदै सिटीका रक्षक जोन स्टोन्सको आत्मघाती गोलमा ब्रुगले बराबरी गरेको थियो । ५४औ मिनेटमा रियाद महारेजले गोलबाट सिटीले पुनः अग्रता लियो । ७२औं मिनेटमा स्टर्लिङले सिटीको अग्रता बढाए । इन्जुरी समयमा गाब्रियल जिजसले अर्को गोल थपेपछि सिटीले सहजै तीन अंक पक्का गर्यो । 

जितपछि सिटीले चार खेलबाट नौ अंक जोडेदै समूहको शीर्ष स्थानमा उक्लिएको छ । समान खेलमा आठ अंक जोडे पीएसजी दोस्रो स्थानमा छ । क्लब ब्रुग चार अंक जोेडेर तेस्रो स्थानमा छ । चौथो स्थानको आरबी लाइपजिगले एक अंक जोडेको छ । 

बुधबार राति नै सम्पन्न समूह ‘ए’को अर्को खेलमा पीएसजीले लाइपजिकसँग २–२ को बराबरी खेलेको हो । जर्मन भ्रमणमा निस्किएको पीएसजीले अंक बाड्दा शीर्ष स्थान गुमाएको छ । 

बुन्डेसलिगाको क्लब लाइपजिगले घरेलु मैदानमा आठौं मिनेटमै क्रिष्टोफर एनकुनकुको गोलबाट अग्रता लिएको थियो । १२औं मिनेटमा लाइपजिगका आन्द्रे सिल्भा पेनाल्टीमा गोल गर्न चुक्दा घरेलु टोलीले अग्रता दोब्बर बनाउने मौका गुमायो । २१औं मिनेटमा पीएसजीका जर्जिनियो विजनाल्डमले बराबरी गोल फर्काए । 

३९औं मिनेटमा विजनाल्डमले गरेको गोलमा पीएसजीले अग्रता लियो । तर, इन्जुरीमा डोमिनिक सोबोजलाईले पेनाल्टीमा गोल गरेपछि पीएसजी अंक बाड्न बाध्य भयो ।