काठमाडौं । सत्तारुढ दल नेकपा माओवादी केन्द्रका नेता चक्रपाणि खनाल बलदेवले प्रदेश र केन्द्रिय संसदको निर्वाचन एकै चरणमा गर्न नसकिने बताएका छन् । उनले भने, “दुवै निर्वाचन बेग्लाबेग्लै चरणमा हुन्छ, दुई चरणमा निर्वाचन भयो भने धेरै राम्रो हुन्छ ।”
उनले समानुपातिक–समावेशिता सुनिश्चितता गर्नको लागि पनि प्रदेश र प्रतिनिधि सभाको निर्वाचन एकै चरणमा गर्न नहुने धारणा राखे । 
खनालले असोज २ गतेको स्थानीय तहको प्रदेश नम्बर २ को निर्वाचन तोकिएकै मितिमा हुने समेत विश्वास दिलाए । उनले भने, “माघ ७ गतेभित्रै सबै तहको निर्वाचन हुन्छ, स्थानीय तहको दुई चरणको निर्वाचन भैसक्यो, अब दुई नम्बर प्रदेशमा बाँकी हो, त्यहाँपनि तोकिएकै मितिमा हुन्छ ।” 
त्यस्तै उनले प्रदेश र प्रतिनिधि सभाको निर्वाचनको मिति पनि चाँडै तोकिने र निर्वाचन क्षेत्र निर्धारण आयोगको प्रतिवेदन चाँडै आउने बताए । 
उनले अघिल्लो सरकारका प्रधानमन्त्री पुष्पकमल दाहाल प्रचण्डले संविधान संशोधन प्रस्ताव पारित गराउनको लागि असाध्यै राम्रो भूमिका निर्वाह गरेपनि निश्कर्षमा पुर्याउन नसकिएकोले अहिलेपनि दुई तिहाई जुटाउने प्रयास भैरहेको बताए । 
नेता खनालले संशोधन नभएपनि चुनाव नरोकिने जिकिर गरे । उनले भने, “चुनाव हुन्छ, हुन्छ, यदि संशोधन प्रस्ताव पारित भयो भने राम्रो कुरा हो, भएन छ भनेपनि चुनाव हुन्छ, रोकिँदैन् ।”
उनले संशोधन प्रस्ताव पारित हुने संभावना भएपनि पारित नै हुन्छ भनेर ठोकेर भन्ने अवस्था अहिले नभएको स्पष्ट पारे । 
उनले २ नम्बर प्रदेशमा हुने स्थानीय तहको निर्वाचनमा आफ्नो पार्टीले राम्रै नतिजा हाँसिल गर्ने समेत जनाए । उनले भने, “हाम्रो पार्टी नेतृत्व अहिले मधेशमा केन्द्रित भएको छ, हामी फुल फ्लेज्ड तयारीमा छौं, राम्रोसँग चुनाव लड्ने हाम्रो तयारी छ ।”