काठमाडौं । प्रतिनिधिसभा र प्रदेशसभा निर्वाचन एकैपटक गर्ने चर्चा चलिरहेका बेला निर्वाचन आयोगले इलेक्ट्रोनिक भोटिङ मेसिन (ईभिएम) प्रयोगबारे छलफल गरेको छ ।

आयोगले निर्वाचनको सम्पूर्ण प्रक्रियालाई शुद्ध, सरल तथा छिटो रूपमा सम्पादन गर्नको लागि भोटिङ मेसिन  प्रविधिको प्रयोग उपयुक्त हुने जनाएको छ । 

आयोगले २०६४ र २०७० सालको संविधानसभा सदस्य निर्वाचन तथा उपनिर्वाचनमा गरी १२ वटा निर्वाचन क्षेत्रमा ईभीएम प्रयोग गरेको थियो ।

त्यतिबेलाको इलेक्ट्रोनिक भोटिङ सफल भएको र सरोकारवालाबाट सकारात्मक प्रतिकृया आएकाले दलहरुको समर्थन र सहयोग भए ईभीएमको प्रयोग गर्न उपयुक्त हुने आयोगको धारणा रहेको छ ।

मंगलबार निर्वाचन आयोगमा राजनीतिक दलहरुसँग यसबारे छलफल गर्दै आयोगले सो इच्छा व्यक्त गरेको हो ।

आयोगले प्राविधिक सहितको एक अध्ययन टोलीलाई हालै भारतमा उत्पादन र प्रयोग भएका विद्युतीय मतदान यन्त्र बारे अध्ययन गरेको थियो । उक्त अध्ययन टोलीको प्रतिवेदनको आधारमा नेपालमा मतदानमा ईभीएमको प्रयोग गर्न उपयुक्त हुने देखिएको निर्वाचन आयोगका प्रवक्ता सूर्यप्रसाद शर्माद्वारा जारी विज्ञप्तीमा उल्लेख छ ।

उनका अनुसार मंगलबार संसदमा प्रतिनिधित्व गर्ने राजनीतिक दलका प्रतिनिधिसँग अन्तरक्रिया कार्यक्रमा सो मेसिन बारे जानकारी गराइएको थियो । 

अन्तरक्रियामा भारतको निर्वाचन आयोगले प्रयोगमा ल्याएको ईभीएम तथा बेलायतस्थित स्मार्टिक कम्पनीले उत्पादन गरेको ईभीएमको विशेषता बारे जानकारी गराइएको थियो । 

कार्यक्रममा नेताहरुले उक्त दुबै मेशिनहरूको प्रयोगको सार्थकता र व्यवहारिकताबारे प्रश्न गरेका थिए भने नमुना मतदान समेत गरिएको थियो ।