रत्ननगर (चितवन) । भरतपुर महानगरपालिका वडा नम्बर १९ मा २० गते शुक्रबार चुनाव हुने भएको छ । जिल्ला निर्वाचन कार्यालयमा भएको सर्वदलीय बैठकले यस्तो निर्णय गरेको हो । 

भरतपुर महानगरपालिका वडा नम्बर १९ को मतगणनाका क्रममा जेठ १४ गते राति माओवादीका दुइ कार्यकर्ताले मतपत्र च्यातेका थिए । मतपत्र च्यातेपछि निर्वाचन आयोगले पुनः निर्वाचनको निर्णय गरेपछि नेकपा एमालेका कार्यकर्ताले सर्वोच्च अदालतमा रिट दायर गरेका थिए । सर्वोच्चले अन्तिम फैसला सुनाउँदै पुनः निर्वाचन गराउने आयोगको निर्णय सदर गरेको थियो ।

त्यसपछि बसेको आयोगको बैठकले जिल्ला निर्वाचन कार्यालयलार्इ मिति तय गरेर निर्वाचन गराउन निर्देशन दिएको थियो । भरतपुरमा बसेको सर्वदलीय बैठकले भोलिदेखि नै मौन अवधि सुरू हुने निर्णय गरेको एमालेका जिल्ला अध्यक्ष कृष्णभक्त पोखरेलले जानकारी दिए ।

जेठ १४ गते राति २७ वटा वडाको मतगणना सकेर २८ औँ वडाको रुपमा भरतपुर महानगरको वडा नम्बर १९ को मतगणना हुँदै थियो । उक्त वडामा दुई हजार ८९७ मत खसेकामा एक हजार ८०९ मत गनेर सकिएको थियो । 

जसमा एमाले प्रमुखका उम्मेदवार देवी ज्ञवालीले ४१ हजार ६४१ मत ल्याएका थिए भने कांग्रेस माओवादी केन्द्र गठबन्धनका प्रमुखका उम्मेदवार रेणु दाहालको ४० हजार ९०८ मत थियो । मतान्तर ७३३ थियो । उक्त १९ नम्बर वडामा मात्रै एक हजार ८०९ मत गन्दा रेणु दाहालको ५१ मत बढी थियो । 

एक हजार ८८ मत गन्न बाँकी थियो । अनि भरतपुर–२० को तीन हजार ३०२ मत गन्न बाँकी नै थियो । एकाएक मतपत्र च्यातिएपछि मतगणना रोकियो । 

त्यसपछि १९वडाका सबै मत खरेजीको निर्णय निर्वाचन आयोगले गरेपछि अब दुई उम्मेदवारको आधिकारिक मत भनेको भरतपुरका २७ वडाको मात्रै हो । जसअनुसार ज्ञवालीको ४० हजार ९८० र दाहालको ४० हजार १९६ मत छ । 

उनीहरुबीचको आधिकारिक मतान्तर ७८४ छ । भरतपुर महानगरको वडा नम्बर १९ मा तीन हजार ७९७ मतदाता छन् । भरतपुर १९ मा किरणगञ्ज, शारदानगर र गुञ्जानगरमा तीन मतदान स्थलमा छ वटा मतदान केन्द्र तोकिएको छ । 

बढ्यो चुनावी सरगर्मी 
 

मतपत्र च्यातिएपछि रोकिएको चितवनको भरतपुर महानगरपालिकामा दुई महिनापछि पुनः चुनावी सरगर्मी बढेको छ । सर्वोच्च अदालतले निर्वाचन आयोगको पुनः मतदान गर्ने निर्णय सदर गरेसँगै यहाँ चुनावी चहलपहल बढेको हो । 

अहिले चुनावी अभियानमा विभिन्न दलका नेता तथा कार्यकर्ता भरतपुर–१९ पुगेका छन् । भरतपुर–१९ का मतदाता राजुभक्त लम्सालले अब दलहरु फेरि चुनावी अभियान लिएर गाउँ आइपुगेको बताए । 

उनले भने,  “सर्वोच्च अदातलको निर्णय आयो, अब अन्तिम निर्णय गर्ने पालो १९ वडाका जनताको ।” 

दलका कार्यकर्ता वडामा आउन थालेका उल्लेख गर्दै अर्का मतदाता उदयराज पराजुलीले भने, “सर्वोच्च अदालतले त निर्णय गर्यो, अब भरतपुर–१९ का मतदाताले कहिले निर्णय गर्न पाउने हो ?” 

नेपाली कांग्रेसको समर्थनमा नेकपा माओवादी केन्द्रका तर्फबाट भरतपुर महानगरको प्रमुखका उम्मेदवार रेणु दाहाल आइतबार बिहानै भरतपुर–१९ पुगिन् ।  दाहालले सर्वोच्च अदालतको निर्णय स्वागतयोग्य भएको चर्चा गर्दै भरतपुर–१९ मा मतदाता समक्ष भेटघाटमा लागेको बताइन् ।

माओवादीका महानगर संयोजक ईश्वर सापकोटाले चुनावी अभियान तीव्र भएको बताए । यता नेकपा एमाले जिल्ला पार्टी कार्यालयले भने केन्द्रको निर्देशन पर्खिरहेको छ । एमालेका जिल्ला उपाध्यक्ष तेजेन्द्र खड्काले केन्द्रको निर्देशनअनुसार अघि बढ्ने बताए । चुनावमै पनि वास्तविकता बुझेर एमालेलाई मतदाताले राम्रो सहयोग गर्ने उनको भनाइ छ । 

एमालेका वडास्तरका नेता तथा कार्यकर्ता आइतबारबाटै भरतपुर–१९ मा सक्रिय भएको सो दलका महानगर प्रमुखका उम्मेदवार देवीप्रसाद ज्ञवालीले जानकारी दिए । 
महानगरको प्रमुखका दुई उम्मेदवार ज्ञवाली र दाहालको कडा प्रतिष्पर्धाका बीचमा मतगणना चल्दै गर्दा जेठ १४ गते राति ११:४५ बजे यहाँ ९० मतपत्र च्यातिएको थियो । 

निर्वाचन आयोगले पुनः मतगणनाको निर्णय गरेपछि भरतपुर महानगर–१९ मा एमालेबाट वडादस्यका उम्मेदवार गुञ्जमान विक र अधिवक्ता तुलसीराम पाण्डेले पुनः मतगणनाको माग गर्दै मुद्दा दायर गरेका थिए । 

मुद्दा हाल्ने विकले अदालतबाट जस्तो निर्णय भएपनि स्वीकार गर्नुपर्ने भएकाले अब चुनावमै जाने बताए । एमालेका महानगर प्रमुखका उम्मेदवार ज्ञवालीले अदालतको निर्णय स्विकारयोग्य नलागेपनि अब चुनावमा गएर जनताको मन जित्ने प्रतिक्रिया दिए । 

कांग्रेस जिल्ला सचिव उत्तम जोशीले पार्टीको निर्णयअनुसार भरतपुर–१९ मा जाने बताए । यहाँ माओवादी केन्द्रले महानगर प्रमुखबाहेक सबैमा काँग्रेसलाई समर्थन गरेको घोषणा गरेको थियो । मतपत्र च्यातिएपछि एमालेका कार्यकर्ताले यस विषयमा मतदातालाई जानकारी दिन भन्दै भण्डाफोर कार्यक्रममार्फत चुनावी अभियान चलाएको थियो । राससको सहयोगमा