काठमाडौं । नेकपा (एकीकृत समाजवादी) ले बाढीपहिरोको जोखिमयुक्त क्षेत्रका बासिन्दालाई सुरक्षित स्थानमा सार्न सरकारसँग माग गरेको छ । लगातारको वर्षाका कारण देशका विभिन्न स्थानमा आएको बाढीले पुर्‍याएको क्षतिप्रति सरकारको ध्यानाकर्षण गराउँदै नेकपा (एस)ले उद्धार तथा राहतमा लाग्न आग्रह गरेको हो । 

“अविरल वर्षाका कारण सुदूरपश्चिम प्रदेशसहित देशका विभिन्न स्थानमा आएको बाढीले तटीय क्षेत्रका सयौँ घर डुबानमा परेको र किसानले लगाएको तरकारी र धान बाली नष्ट भएको छ,” एकीकृत समाजवादीको आग्रह छ, “जोखिमयुक्त क्षेत्रका बासिन्दालाई तत्काल सुरक्षित स्थानमा सार्न र उद्धार तथा राहतका लागि सरकार एवम् सम्बन्धित निकायको ध्यानाकर्षण गराउँदै सम्पूर्ण पार्टी पङ्क्तिलाई  उद्धार र राहतको काममा परिचालित हुन अनुरोध गर्दछौँ ।”

आइतबारदेखि देशका विभिन्न क्षेत्रमा लगातार वर्षा भइरहेको छ ।