काठमाडौं । अञ्जन विष्टले अन्तिम समयमा बराबरी गोल फर्काएपछि नेपालले साफ च्याम्पियनसिपमा आज बंगलादेशसँग १–१ को बराबरी खेलेको छ । यससँगै नेपालले पहिलोपटक प्रतियोगिताको फाइनलमा स्थान बनाउन सफल भएको छ ।
कम्तीमा बराबरी गर्नुपर्ने खेलमा नेपाल नवौँ मिनेटमै १-० ले पछि परेको थियो । तर, खेल सकिन तीन मिनेट बाँकी हुँदा अञ्जनले पेनाल्टीमा बराबरी गोल फर्काएपछि नेपालले साफ च्याम्पियनसिपको फाइनलमा स्थान बनाएको हो ।
बंगलादेशका साद उद्धिनले अञ्जन विष्टलाई फाउल गरेपछि नेपालले पेनाल्टी अवसर पाएको थियो । उक्त अवसरलाई अञ्जनले कुनै गल्ती नगरी पोस्टको दिशा दिए । अञ्जनको त्यही गोल नेपाललाई ऐतिहासिक सफलता दिलाउन पर्याप्त बन्यो ।
पहिलो दुई जितेर ६ अङ्क जोडेपनि तेस्रो खेलमा भारतसँग १–० ले पराजित भएपछि नेपाललाई आज फाइनल पुग्नका लागि कम्तीमा बराबरी गनु पर्ने थियो । बंगलादेशलाई भने आजको खेल जित्नैपर्ने थियो ।
तर, नेपालले नवौँ मिनेटमा गोल खाएपछि नेपाल दबावमा परेको थियो । बंगलादेशले सुमोन रेजाले गरेको गोलबाट अग्रता लिएको हो ।
खेलको ७९औँ मिनेटमा बंगलादेशका गोलकिपर अनिसुर रहमान जिकोले रातो कार्डको सामना गरेपछि बंगलादेश १० खेलाडीमा सीमित बनेको थियो । जिकोले पेनाल्टी क्षेत्रबाहिर आएर बल रोक्ने प्रयास गरेपछ उनले सिधै रातो कार्ड पाएका हुन् । उनले अञ्जन विष्टले हानेको प्रहारलाई हातले रोकेका थिए ।
नेपालले अब माल्दिभ्स र भारतमध्ये एकसँग फाइनलमा उपाधिका लागि प्रतिस्पर्धा गर्नेछ । आयोजक माल्दिभ्सले आज भारतसँग प्रतिस्पर्धा गर्दैछ ।
बंगलादेशविरुद्ध आज नेपालले पछिल्लोपटक भारतविरुद्ध खेलेको टोलीमा तीन खेलाडी परिवर्तन गरेको थियो । मनिष डाँगी, सुमन अर्याल, सुमन लामाको स्थानमा अन्जन विष्ट, आयुष घलान र नवयुग श्रेष्ठलाई पहिलो रोजाइमा राखिएको थियो ।