काठमाडौं । गोपीचन्द्र पार्कीले विश्व चर्चित म्याराथनमध्येको एक बर्लिन म्याराथन सहभागिता जनाउने भएका छन् ।
यही सेप्टेम्बर २६ तारिखमा हुने म्याराथनका लागि पार्की मंगलबार राति ८ः४० बजे कतार एयरवेजबाट बर्लिनतर्फ प्रस्थान गर्नेछन् ।
उनको प्रशिक्षकमा सन्तोष श्रेष्ठ छन् । उनीहरूलाई राष्ट्रिय खेलकुद परिषद् (राखेप)का सदस्यसचिव रमेशकुमार सिलवालले मंगलबारै बिदाइ गरे । टोलीको हवाई टिकट राखेपले व्यवस्था गरिदिएको हो ।
१३औँ दक्षिण एसियाली खेलकुद (साग)का स्वर्णपदक विजेता पार्कीको व्यक्तिगत उत्कृष्ट टाइमिङ दुई घण्टा १८ मिनेट ५९ सेकेन्ड रहेको छ ।
यसैबीच, नेपालगन्ज म्याराथन आयोजक क्रिएटिभ ह्यान्ड्सले पनि पार्की र श्रेष्ठलाई मंगलबारै छुट्टै कार्यक्रम आयोजना गरी बिदाइ गर्यो ।
सदस्यसचिव सिलवाल, क्रिएटिम ह्यान्ड्सका अध्यक्ष टीएस ठकुरीलगायतले उनीहरूलाई बिदाइ गरे ।