काठमाडौं । मेलम्ची नगरपालिकाले मेलम्ची–इन्द्रावती क्षेत्रमा आएको बाढी–पहिरो प्रभावितहरुको राहत, पुनर्वास तथा पुनःस्थापना र पुनर्निर्माणको लागि सबै स्थानीय तहहरुलाई अपिल गरेको छ । नगरप्रमुख डम्बरबहादुर अर्यालले आज विज्ञप्ति जारी गर्दै यस्तो अपिल गरेका हुन् ।

“हालसम्म बनेको संरचनाहरु ध्वस्त हुनु, नागरिकहरुलाई संकटको बेला स्थानीय सरकारको उपस्थितिको महसुस गराउनु र विस्थापितहरुलाई पुनःस्थापना गराउनु, भत्किएका सार्वजनिक संरचनाहरुको पुनर्निर्माण गर्नु र अन्य आम नागरिकहरुको अपेक्षासँगै विकास निर्माणलाई अगाडि बढाउने जिम्मेवारी एकातिर छ भने स्रोत–साधनको सीमितता, आन्तरिक स्रोतमा संकुचन, बाढी प्रभावितहरुलाई छुट तथा सहुलियतले हामीलाई आर्थिक स्रोतको चरम अभाव हुने अवस्था सिर्जना भएको छ,” अपिलमा भनिएको छ ।

यही असार १ गते मेलम्ची र इन्द्रावती खोलामा आएको भीषण बाढीले हेलम्बु गाउँपालिका, पाँचपोखरी थाङ्पाल गाउँपालिका, मेलम्ची नगरपालिका र इन्द्रावती गाउँपालिकामा व्यापक जनधनको क्षति गरेको छ । मेलम्ची नगरपालिकामा मात्रै यस बाढीबाट हालसम्म करिब ५०० परिवार विस्थापित भएको प्रारम्भिक तथ्यांक रहेको नगरपालिकाले जनाएको छ ।

“मेलम्ची नगरपालिकामा मात्रै यस बाढीबाट हालसम्म करिब ५०० परिवार विस्थापित भएको प्रारम्भिक तथ्यांक प्राप्त भएको छ भने वर्षात्को मनसुनसँगै इन्द्रावती र मेलम्ची खोलाले अझै थप कटान गरी क्षति पुर्‍याउने कम जारी नै छ । मेलम्ची नगरपालिकाको गौरवको आयोजनाहरु मेलम्ची सिटी पार्क, मेलम्ची बसपार्क, फोहोरमैला प्रशोधन केन्द्रलगायतका अर्बौँको योजनाहरु बाढीले नाम–निशाना समेत नरहने गरी बगाएको छ भने यस क्षेत्रको सडक, पक्की पुल, झोलुंगे पुल, खानेपानी, सिँचाइ कुलोजस्ता सार्वजनिक संरचनाहरुमा ठूलो क्षति पुर्‍याएको छ,” विज्ञप्तिमा भनिएको छ ।