काठमाडौं । प्रतिनिधिसभाका सभामुख अग्निप्रसाद सापकोटाले बाढीले सिन्धुपाल्चोकको तातोपानी–कोदारी क्षेत्रमा पुर्याएको क्षतिप्रति सरकारको ध्यानाकर्षण गरएका छन् ।
शनिबार सभामुख सापकोटा र भौतिक पूर्वाधार तथा यातायातमन्त्री वसन्तकुमार नेम्बाङबीच तातोपानी–कोदारी क्षेत्रमा क्षति न्यूनीकरण र जोखिममा परेका स्थानीको सुरक्षित स्थानान्तरणका विषयमा संवाद भएको हो ।
गए रातिको अविरल वर्षापछि भोटेकेसी गाउँपालिकास्थित तातोपानी–कोदारी क्षेत्रमा अरनिको राजमार्ग र लिपिङ पुलमा क्षति पुर्याएको जनाइएको छ । उनले जोखिममा परेका स्थानीयको उद्धार, सुरक्षित बसोबास र बन्द सडक तत्काल सञ्चालनमा ल्याउन ध्यानाकर्षण गराएको सभामुखको सचिवालयले जनाएको छ ।
सभामुख सापकोटा र मन्त्री नेम्बाङबीचको संवादपछि आजै सडक विभागका महानिर्देशक अर्जुनजंग थापासहितको टोलीले कटान क्षेत्रको स्थलगत अवलोकन गरेको छ । महानिर्देशक थापाले केही दिनभित्रै बन्द सडक सञ्चालन गरिने जानकारी दिए ।
भोटेकोसी नदीको कटानले लिपिङ पुलमा क्षति पुगेको र अरनिको राजमार्गअन्तर्गतको सडक ठाउँ–ठाउँमा भासिएको जनाइएको छ ।