काठमाडौं । स्वतन्त्र उर्जा उत्पादकहरूको संस्था नेपाल (इप्पान)ले अविरल वर्षाका कारण देशभर आएको बाढी तथा पहिरोका कारण ठूलो मात्रामा धनजनको क्षति भएको भन्दै दुःख व्यक्त गरेको छ । शुक्रबार एक विज्ञप्ति जारी गर्दै इपानका अध्यक्ष कृष्णप्रसाद आचार्यले दुःखद समयमा सबै पीडितहरूलाई साथ र सहयोग गर्न आह्वा गरेका छन् । इपानले यस प्रकोपबाट घरबारविहीन भएकाहरूलाई १० लाखको राहत वितरण गर्ने पनि जनाएको छ । 

बाढी पहिरोका कारण निर्माणाधीन तथा निर्माण सम्पन्न भइसेकेका जलविद्युत आयोजनाहरू तथा विभिन्न ट्रान्समिसन लाइनहरूमा ठूलो क्षति हुन गएकोमा पनि इपानले दुःख व्यक्त गरेको छ । हाल ऊर्जा क्षेत्रमा भएको क्षतिलाई मध्येनजर गर्दै सरकारले आयोजना स्थलसम्म पुग्ने पहुँच मार्गमा क्षति भएका स्थानको तत्काल पुनःनिर्माण गर्नुपर्ने इपानले जनाएको छ । 

यस्तै आयोजना स्थल तथा मानविय वस्तिसम्म निर्माण तथा वितरण गरिएका र हाल बाढीका कारण क्षति पुगेका प्रसारण लाइनहरू तत्काल सुचारु गरिनुपर्ने, विद्युत प्राधिकरणले निर्माण गरेका सवस्टेसनहरूको सुरक्षार्थ तत्काल उचित कदम चाल्नुपर्ने र गृह मन्त्रालय, ऊर्जा, जलस्रोत तथा सिँचाइँ मन्त्रालय, अर्थ मन्त्रालय तथा अन्य सरोकारवाला निकायहरूको उच्चस्तरीय संयन्त्र बनाई समस्याहरू तत्काल सम्बोधन गर्नुपर्ने इपानको माग छ । 

विज्ञप्तिमा दीर्घकालिन रूपमा सहयोगका लागि बिमा भुक्तानी कार्यका लागि सहजीकरण गर्नुपर्ने तथा बिमा भुक्तानी छिटो र सहज बनाउन बिमा समिति तथा अर्थ मन्त्रालयले पहलकदमी गर्नुपर्ने उल्लेख गरिएको छ ।