काठमाडौं । नेपाल क्रिकेट संघ क्यानद्वारा आयोजना भएको प्रधानमन्त्री कप महिला तथा पुरुष क्रिकेट र काठमाडौं पुरुष मेयर कप र ललितपुर मेयर कपको पुरस्कार पाउन सकेका छैनन् । प्रतियोगिता सकिएको लामो समय वितिसक्दा पनि खेलाडीले पुरस्कार रकम पाउन सकेका छैनन् । प्रधानमन्त्री कप महिला क्रिकेट प्रतियोगिता मंसिर १८ गते देखि २६ गतेसम्म दाङको देउखुरी क्रिकेट मैदानमा चलेको थियो ।
 
जसमा प्रदेश १ ले विभागीय टोली एपीएफलाई हराउँदै उपाधि उचालेको थियो । प्रदेश १ ले एपीएफमाथि ऐतिहासिक जित निकालेको हो । प्रदेश १ को घरेलु क्रिकेटमा पहिलो उपाधि पनि हो ।
 
उपाधि उचाल्दा प्रदेश १ ले पाँच लाख पाउँदा दोस्रो भएको टोली एपीएफले ३ लाख पाउने तय थियो । महिला प्रधानमन्त्री कप क्रिकेट सम्पन्न भएको अहिले ६ महिना पुगिसक्यो । तर, पनि खेलाडीहरुले हालसम्म पुरस्कार पाउन सकेका छैनन् । राष्ट्रिय खेलकुद परिषद्को सहयोगमा क्यानले प्रतियोगिताको अयोजना गरेको थियो ।
 
जुन प्रतियोगितामा राखेप सदस्य–सचिव रमेश सिलवाल प्रमुख अथिति थिए । प्रतियोगिताको समापन पछि सदस्य–सचिव सिलवालले पैसाको अभावका कारण खेलाडीहरु खेलदेखि डराउनु पर्ने अवस्था नआउने बताएका थिए । आर्थिक अभाव भएमा राखेपले नेपाली महिला क्रिकेटमा लगानी गर्ने बाटोको विकास पनि गर्ने बताएका थिए । उनले भनेका थिए, “नेपाली महिला क्रिकेटमा धेरै सम्भावना छ । आर्थिक अभावका कारण खेलाडीहरु डराउनु पर्ने अवस्था आउँदैन ।” सदस्य–सचिवलै नै आशा देखाएको कुरामा हालसम्म खेलाडीले पुरस्कार पाउन भने सकेका छैनन् । 

त्यसपछि माघ २ गतेदेखि १७ गतेसम्म राजधानीमा प्रधानमन्त्री कप पुरुष क्रिकेट आयोजना भएको थियो । उक्त प्रतियोगितामा त्रिभुवन आर्मी क्लबले विभागीय टोली एपीएफलाई हराउँदै उपाधि उचालेको थियो । उपाधि विजेता आर्मीले १० लाख पाउँदा उप–विजेता टोली एपीएफले ५ लाख पाउने तय थियो । हाल उक्त प्रतियोगिता सम्पन्न भएको पाँच महिना पुग्न लाग्यो । प्रतियोगिता सम्पन्न भएको लामो समय पुग्दा पनि हालसम्म खेलाडीले पुरस्कार पाउन सकेका छैनन् । यो प्रतियोगितामा खेलकुद मन्त्री र सदस्य–सचिव उपस्थित थिए । 

त्यसपछि काठमाडौं महानगरपलिका क्रिकेटसँग जोडिन पुग्यो । महानगरले आफ्नो सहयोगमा क्यानलाई क्रिकेट प्रतियोगिताको योजना गर्न लगायो । पुरुष क्रिकेट आयोजनामा सहयोग गर्ने जिम्मेवारी लिएको महानरगरले क्यानलाई ५० लाख रुपैयाँ सहयोग गर्यो । उक्त सहयोगमा क्यानले फागुन १९ देखि २६ गतेसम्म काठमाडौं मेयर कप क्रिकेटको आयोजना गर्यो । उक्त प्रतियोगिताको फाइनल खेलमा एपीएफलाई हराउँदै पुलिसले उपाधि उचाल्यो । 

प्रतियोगिताको विजेताले १० लाख पुरस्कार पाउने छ । त्यस्तै उप–विजेताले ५ लाख । काठमाडौं महानगरपालिकाका मेयर विधा सुन्दर शाक्यले प्रतियोगिताको पुरस्कार दिँदै गर्दा आफूहरुले नेपाली खेलकुद क्षेत्रमा खेलाडीहरुले पनि केही गरुन् भन्ने हिसावले सहयोग गरेको बताए । उनले खेलाडीलाई यो किसिमको प्रतियोगिताले आर्थिक अभाव हुनबाट जोगाउने बताए । तर, खेलडीले उक्त प्रतियोगिताको पनि हालसम्म पुरस्कार पाएका छैनन् ।
 
त्यसैको केही सयम पछि ललितपुर महानगरपालिका पनि क्रिकेटसँग जोडियो । महानगरले ३० लाख सहयोग गर्दै क्यानलाई प्रतियोगिता गर्न जिम्मेवारी दियोे । उक्त प्रतियोगितामा प्रदेश १ लाई हराउँदै एपीएफले उपाधि उचाल्यो । 

ललितपुर महानगरका मेयर चिरिबावु महर्जनले उक्त प्रतिगिताको पुरस्कार वितरण सभाममा आफूहरुको पहिलो प्रयास भएको हुनाले आगामी संस्करणहरुमा पुरस्कार बढाउँदै जाने बताएका थिए । तर, ललितपुर महानगरले हालसम्म पुरस्कार रकम दिएको छैन ।

यसविषयमा क्यानले भने आफूहरुले सबै कागजपत्र राखेप र महानगरपालिकाहरुमा पुर्याइसकेको बताएको छ । क्यानका सचिव अशोकनाथ प्याकुरेलले आफूहरुले सबै कागजपत्र पुयाईसके पनि दुबै पक्षबाट ढिलाई भएको बताएका छन् । उनले अबको केही दिनमा नै खेलाडीले पुरस्कार पाउने बताए । 

“हामीले कागजपत्र सबै बुझाइ सकेका छौं । उताबाट केही समय लागेको हो । अब खेलाडीले छिट्टै पुरस्कार पाउनेछन्,” प्याकुरेलले बाह्रखरीसँगको कुराकानीमा भने ।