काठमाडौं । नेदरल्यान्ड्सले युरोकप फुटबलमा विजयी सुरुवात गरेको छ । १६औँ संस्करणको प्रतियोगिताको आफ्नो पहिलो खेलमा नेदरल्यान्ड्सले रोमाञ्चक जित निकालेको हो ।
आइतबार राति भएको खेलमा नेदरल्यान्ड्सले युक्रेनलाई ३–२ ले हरायो । आम्स्टरडामस्थित जोहन क्रुफ एरिनामा नेदरल्यान्ड्सलाई जित दिलाउन जर्जिनियो विनाल्डम, वाउट वेगहोर्स्ट र डेन्जल डम्फ्राइजले एक/एक गोल गरे । युक्रेनका लागि एन्ड्री यार्मोलेन्को र रोमन यारेमचुकले एक/एक गोल फर्काए ।
पहिलो हाफ गोलरहित बराबरीमा सकिएको थियो । दुवै टोलीले दोस्रो हाफमा गोल गरेका हुन् । जितसँगै समूह ‘सी’को नेदरल्यान्ड्सले महत्वपूर्ण ३ अंक जोडेको छ ।
नेदरल्यान्ड्स समूहको दोस्रो स्थानमा छ । ३ अंक नै जोडेको अष्ट्रिया शीर्ष स्थानमा छ । युक्रेनले भने हारबाट प्रतियोगिताको सुरुवात गरेको छ ।