काठमाडौं । कोभिड १९ विरुद्धको खोप लिनका लागि अनलाइन फारम भर्नेहरूको पालो तत्काल नआउने स्वास्थ्य तथा जनसंख्या मन्त्रालयले जनाउँदै आएको छ । सरकारलाई खोपको माग आकलन गर्न, व्यवस्थापन गर्न र खोप केन्द्रमा लाइन बस्न नपरोस् भन्ने उद्देश्यले अनलाइन फारम उपलब्ध गराइएको भएपनि उनीहरूलाई तत्काल खोप दिन भने नसकिने जनाइएको छ ।
मन्त्रालयको नियमित पे्रस ब्रिफिङका क्रममा खोप विभागका प्रमुख डा. झलक गौतमले प्राथमिकताका आधारमा सबैलाई क्रमशः खोप उपलब्ध गराइने बताए ।
त्यस्तै पहिलो डोज कोभिसिल्ड खोप लिएर दोस्रो डोजको पर्खाइमा रहेकाहरूलाई पनि दोस्रो डोज उपलब्ध गराउन सरकार कूटनीतिक तवरबाट पहल गरिरहेको डा. गौतमले बताए ।
उनले एउटा डोज मात्रै खोप लिएकाहरू पनि संक्रमणबाट धेरै हदसम्म बच्ने र तथा संक्रमित भइहाले पनि सिकिस्त नहुने अध्ययनहरूले प्रमाणित गरेकाले नआत्तिन आग्रह गरे ।