काठमाडौं । काठमाडाैं उपत्यकामा खुकुलो मोडालिटीसहित एकसाता निषेधाज्ञा थप गरिने निर्णय भएको छ । आइतबार काठमाडौं, भक्तपुर र ललितपरका प्रमुख जिल्ला अधिकारीको बैठकले वैशाख १६ गतेदेखि जारी निषेधाज्ञालाई एकसाता थप गर्ने निर्णय गरेको हो । 

जेठ ३१ गते (सोमबार) सम्मका लागि जारी गरिएको निषेधाज्ञाको मोडालिटी फेरबदल गरेर खुकुलो मोडालिटी बनाइएको ललितपुरका प्रमुख जिल्ला अधिकारी ढुण्डीप्रसाद निरौलाले बताए । ‘‘पछिल्लो समय कोरोना संक्रमण र मृत्युदर घटेको छ । तर संक्रमणको जोखिम भने घटेको छैन । त्यसैले निषेधाज्ञा थप गरेका हौँ । निषेधाज्ञाको मोडालिटी खुकुलो बनाइएको छ,” प्रजिअ निरौलाले भने । 

थप गरिएको निषेधाज्ञाको मोडालिटी बमोजिम जेठ ३१ गतेसम्मको निषेधाज्ञामा बिहान ९ बजेसम्म खाद्यान्न तथा पसल र तरकारी पसल खुल्दै आएका छन् । अब ११ बजेसम्म खुलाउन दिइने छ । विकास निर्माणका कामलाई स्वास्थ्य मापदण्ड पालना गरी अगाडि बढाउन दिइनेछ । 

बैङ्क तथा वित्तीय संस्था, सरकारी कार्यालय लगायत अन्य क्षेत्रमा काम गर्ने कर्मचारीको निजी सवारी साधनको आवतजावतमा समेत सहजीकरण हुने गरी निर्णय भएको छ । तर, सवारीमा आवतजावतमा पूर्ण स्वास्थ्य मापदण्ड अनिवार्य पालना गर्नुपर्नेछ । सार्वजनिक सवारी साधनको हकमा पहिलाकै मोडालिटी रहेको छ । जसअनुसार जोरबिजोर प्रणाली तत्काल लागु हुने छैन । मास्क लगाएर यताउता हिँडडुुल गर्न दिइनेछ । 

व्यवासायिक गतिविधि लामो समयदेखि ठप्प रहेकाले बजार पसल खुला गर्ने नयाँ नियम जारी गरिएको छ । भाडा पसल, पुस्तकालय, कस्मेटिक्स, फेन्सी पसलहरूका लागि समय तथा बार अनुसार खोल्न दिइने गरी तोकिएको छ । 

‘‘उपत्यकाको निषेधाज्ञा भोलि राति १२ बजे सकिँदैछ । प्रजिअ निरौलाले बाह्रखरीसँग भने, ‘‘खेती गर्ने महिना भएकाले यसबारे सहजीकरण गरिने निर्णय गरेका छौँ । जस अन्तरगत बिउ, मल ढुवानी र स्वास्थ्य मापदण्ड पालना गरी कृषिखेति गर्न दिइनेछ ।”

प्रशासनका अधिकारीकाअनुसार घट्दो संक्रमण र बढ्न सक्ने जोखिमलाई मध्यनजर गर्दै निषेधाज्ञामा खुकुलो प्रावधान ल्याइएको हो । डेढ महिनाअघि देखिको निषेधाज्ञाले प्रभावित भएको आम जनगुनासो बढ्दै आएको थियो ।
 
काठमाडौं उपत्यकाका तीन जिल्ला प्रशासनले कार्यालयले कोरोना संक्रमण नियन्त्रण गर्न भन्दै जारी गरेको निषेधाज्ञा डेढ महिना बढी भएको छ । 

यसअघि उपत्यका मेयर फोरमका अध्यक्ष तथा काठमाडौं महानगरपालिकाका मेयर विद्यासुन्दर शाक्यले उपत्यका छिर्ने नाकामा कडाइ गरी निषेधाज्ञा खुकुलो बनाइनुपर्ने बताएका थिए । मेयर शाक्यले उपत्यका भित्रका नागरिकलाई स्वास्थ्य मापदण्ड पालना गरी चरणबद्ध रूपमा निषेधाज्ञा खुकुलो बनाउनुपर्ने बताएका थिए । 

स्वास्थ्य मन्त्रालयको तथ्यांकअनुसार अहिले काठमाडौं उपत्यकामा औसतमा दैनिक ६ सयको हाराहारीमा संक्रमित थपिरहेका छन् ।