site stats
बाह्रखरी :: Baahrakhari
ब्लग
Nabil BankNabil Bank
Sarbottam CementSarbottam Cement
Ghorahi CementGhorahi Cement
उज्ज्वलले समेत उज्यालो दिन नसकेको समाज 

आज  तिम्रो १३  औँ दिनको पुण्यतिथि ।  देश तिम्रो  जुठोबाट मुक्त भएको छ । तर, झुटो बोलेर नागरिकलाई दुःख दिनेहरूबाट भने मुक्त भएको  छैन । हुन त मृत्यु वरण गर्ने सबै श्रद्धाञ्जलिका हकदार हुन्छ्न् । तर आफ्नो पार्टीका झिना मसिना कार्यकर्तालाई समवेदना दिने र श्रदाञ्जलि सभा राख्नेहरुले तिम्रालागि दुई शब्दसम्म पनि खर्च गर्न सकेनन्। गरून् पनि कसरी ? अध्याँरो मनले सत्यको उज्यालोको सामना गर्न त्यति सजिलो कहाँ हुन्छ र ?  
 
तिमी अब सम्झनामा मात्रै बाँकी भयौ ।अब तिमी छैनौ भन्ने कुराले  पीडा त दिन्छ  तर नियतिको अगाडि हाम्रो के नै लाग्छ र ? भन्छन्,  यो कली युग हो । यहाँ तिमीजस्ता राम्रा मान्छे धेरै समय बस्न सक्दैनन्। यो समाज तिम्रो व्यक्तित्व सुहाउँदो त थिएन तर पनि यो समाज र राज्यलाई गति दिन तिम्रो आवश्यकता थियो । तिमी यो समाजका लागि बनेकै थिएनौ । किनभने यो समाज तिम्रो इमानदारीमैत्री थिएन । भलै, तिमीले भरमग्दुर प्रयास गरेका थियौ नागरिक, समाज र राज्यलाई सही मार्गतर्फ डोर्‍याउन ।

अब जहाँ पनि  हुन्छौं त्यहाँ तिमीलाई शान्ती मिल्नेछ। तिमीले तिम्रोतर्फबाट शतप्रतिशत दिँदा दिँदै पनि यो समाज र राष्ट्रको संरचनामा केही बदलाव आएन । तिम्रो योजनामा साथ दिनेहरू कोही भएनन् । सामाजिक सञ्जालमार्फत् कुर्लिए र उचाले तिमीलाई । अनि पछारे भुइँमा नमज्जाले । यहाँ नफाट्नको लागि त ब्रान्डको ट्याग भएकै जुत्ता लगाउनुपर्छ । चाहे त्यो बलियो होस् या कमसल। यहाँ उचाल्ने र पछार्नेको भिड छ भन्ने जान्दाजान्दै पनि तिमीले आफ्नो कर्तव्य पूरा गर्न कसर राखेनौ । त्यो नै ठूलो योगदान थियो । तिमी जहाँ पनि छौ विचित्रको शान्ति महसुस गरिरहेको छौ होला ।
 
तैपनि,  अब तिमीसँग भौतिक भेटघाट हुँदैन भनेर स्वीकार्न गाह्रो भएको छ। लाग्छ, तिमी यो समाजमा देवदूत बनेर आयौ । र थाेरै भए पनि सत्यकाे बाटो देखायौ। भगवानका दूतहरू धेरै दिनका लागि आउँदैनन् । यो समाजको परीक्षा लिन थोरै समयका लागि आउँछन् । अब यो समाजले तिमीबिनाकाे बाँकी यात्रा आफैँ तय गर्नुपर्छ। उज्ज्वलले उज्यालो बनाउन नसकेको समाजलाई तिमी भगवानको घरबाट हेरेर मुस्कुराउँदै छौ होला।
 
यहाँबाट तिमीलाई दुःख, थकाइ, धोका मात्रै मिल्यो । र, अन्त्यमा आफ्नै घर फर्कन बाध्य बनायो। तिमी यो अशान्त समाजको अस्थिर व्यवस्थासँग लड्दा लड्दै थकित थियौ । जे  होस् तिमी फर्कँदा फर्कँदै नेपालीको मनमुटुमा सधैँ रहने भएर फर्कियौ। 
तिम्रा ध्येयका लागि  लड्नेहरूलाई यो  जीवन एउटा कठिन यात्रा बनेको छ । तिमीविना हामीले शून्यलाई अँगाल्नु  पर्नेछ र लतार्नु पर्नेछ जिन्दगी यही अस्थिर व्यवस्थाको सिकार भएर । तिम्रो सम्झना हाम्रो प्रत्येक सास सँगै हुनेछ। फोक्सोमा अक्सिजन पुर्‍याउन नपाएर तिमीसँगै थुप्रै नेपालीले प्राण छोडेका छन् । ती सबैका आफन्तका आत्मामा पनि तिमी सधैँ बसिरहने छौ ।आज देशले सम्पूर्ण नेपाली जनताको नेता गुमाएको छ । इतिहासमा आफ्नो नाम स्वर्ण अक्षरले लेखाएर गयौ।
 
पदमा टाँसिएर बस्नु हुँदैन भनेर तिमीले  सिकाएको पाठ एक दिन यहाँका मनुवाले बुझ्नेछन् र आत्मसात गर्नेछन् । हुन त, तिमीलाई लाग्ला तिमीले यो समाजमा धेरै गर्न बाँकी छ र त्यसको लागि  फेरि  आउँछु  भन्ने । तर, पनि तिम्रो लागि आराम गर्ने समय हो यो । अहिले आरामै गर । जुन दिन हाम्रो समाजका नागरिक  विवेकशील हुन्छन् र  यो समाज  तिम्रो उपस्थितिको लायक हुन्छ, तबमात्र आउनु ।
 
कुनै बेला मतपत्रमा तिम्रो नाम नदेख्ने र देख्न नचाहनेहरूले तिम्रो अनुपस्थितिमा धेरै अक्षर लेखे । सायद उनीहरु जान्छन् -  तिमी भएको ठाँउमा समाजिक सञ्जाल छैन भनेर । हुन त सामाजिक सञ्जालमा कुर्लिनेहरू तिम्रा समर्थक थिए भन्ने हो भने तिमी हिजो जहाँ थियौ त्यहाँ हुँदैन थियौ र पनि तिमीले छाडेर गएपछि त झन् समाजिक सञ्जालमा तिम्राप्रतिको हार्दिक श्रद्धाञ्जलिको वर्षा नै छ । झन् ती पोस्टहरूमा आएका  लाइक, कमेन्ट र सेयर त गनि सक्नु नै छैन।  तिम्रो श्रद्धाञ्जलिका लागि समाजिक सञ्जालमा गनेरै नसकिने लाइक , कमेन्ट  र सेयरकाे सट्टा भोट  दिएको भए आज सायद देशकाे हालत अलि फरक हुन्थ्यो कि ? यसले प्रष्ट हुन्छ यहाँ गोहीकाे आँशु चुहाउनेमात्र छन् र उनीहरू सामाजिक सञ्जालमा होइन असामाजिक  जन्जालमा मस्त छन् ।
 
तिमी नेपाल हाम्रो घर हो डेरा होइन भन्थ्यौ । तर, तिमी हामीलाई डेरामा नै छोडेर आफ्नो घर गयौ। हामी डेरामा नै छौँ र रहने छौँ । सायद हामी घरमा बस्ने हैसियत भएका नै थिएनौ होला ।

Agni Group

तिमी नेता थियौ कि थिएनौ मलाई थाहा भएन । तर तिमी एउटा असल र जिम्मेवार नागरिक  भने अवश्य थियौ। तिमी समाजको विकृति, विसङ्गति सफा गर्ने असल नागरिक थियौ । तिमीजस्ता धेरै युवा यो देश सही दिशातिर लम्किनुपर्छ  भन्ने चाहना राख्छन् तर आवाज उठाउन सक्दैनन् । किनभने उनीहरुलाई सुन्ने कोही छैनन् । तिनै आवाज विहीनहरूको आवाज थियौ तिमी ।

दुर्भाग्य, आवाज  उठाउँदा उठाउँदै थकित भएर बिदा भयौ । सकारात्मक र मजबुत समाज निर्माणका लागि असल नेतामात्रै होइन असल नागिरककाे पनि आवश्यकता हुन्छ । जब नागरिक असल हुन्छन्, सचेत हुन्छ्न् तिनैमध्येबाट असल नेता निस्कन्छन् । शान्तिसँग  बाँच्न नपाउनेहरुले  भन्ने एउटामात्र कुरा  छ त्यो हो आत्माले शान्ति पाओस् । तिनको श्रद्धाञ्जलि बिनै पनि तिम्रो आत्माले शान्ति पाइसकेको छ । यो बिरामी समाजसँगको दूरीले तिमीलाई अद्भूत शान्ति दिएको हुनुपर्छ । 

Global Ime bank

यो १३ दिनमा तिम्रो यति  धरै बढाइचढाइ गरियो कि म अचम्म भएँ । धेरै लेख पढ्ने अवसर पाएँ । एउटा कुरा प्रष्ट  के भयो भने तिमी यस्तो थियौ उस्तो थियौ भन्नेहरू तिमीले बनाएको पार्टीका नभएर अन्य पार्टीका थिए । दुःख लाग्दो कुरा, फेरि एकपटक तिम्रो नाममा राजनीति गरे । जिउँदो  हुँदा देखाएको  बाटो नहिँड्ने ,  साथ र सम्मान  नदिने  तर मरेपछि श्रद्धाञ्जलिको ओइरो  लगाउने  संस्कारबाट  ग्रस्त छ हाम्रो  समाज । यसैको झल्को छर्लङ्गै देखियो यसपटक ।
 
यहाँ त अशान्तिमात्र छ र अशान्ति नै रहने छ । तर एक दिन  विवेक हराएका नागरिकको विवेक फिर्ता आउनेछ  र तिमीजस्ता  थुप्रै   विवेकशील नागरिकको सपना  साकार हुनेछ  भन्ने  आशा  छ । तिम्रो आत्माले शान्ति महसुस गरिरहेको छ भन्नेमा विश्वास छ । 
 

NIBLNIBL
प्रकाशित मिति: आइतबार, जेठ ३०, २०७८  ०८:४२
Sipradi LandingSipradi Landing
worldlinkworldlink
Nepal TelecomNepal Telecom
प्रतिक्रिया दिनुहोस्
Ncell Side Bar LatestNcell Side Bar Latest
Bhatbhateni IslandBhatbhateni Island
Kumari BankKumari Bank
Shivam Cement DetailShivam Cement Detail
Maruti cementMaruti cement
ICACICAC