पोखरा । गतवर्षको नयाँ बजेटपछि कांग्रेस संसदीय दलमा विग्रहजस्तै देखियो । दलका नेता कृष्णचन्द्र नेपाली पोखरेलविरुद्ध अन्य सांसदको विमती बढ्यो । संसदीय दलका १५ जना सांसद गुट उपगुटमा बाँडिए । यतिसम्म कि सभापति शेरबहादुर देउवा निकट मानिने १० सांसदले दलका नेता नै हटाउने गृहकार्य थाले । हस्ताक्षरसमेत संकलन गरियो । 

देउवानिकट १० सांसदले हस्ताक्षर संकलन गरेर पोखरेल हटाउन काठमाडौं देउवा निवास पुगेरै दबाब दिए । 

त्यतिबेला काङ्ग्रेस पनि आन्तरिक कलहमा थियो । गण्डकीको उक्त प्रस्तावले सातै प्रदेस, र केन्द्रीय राजनीतिसमेत तरंगित बन्ने ठानेर देउवाले उक्त प्रस्ताव अस्विकार गरे ।

महामन्त्री शशांक कोइराला निकट पोखरेललाई नै निरन्तरता दिने निर्णय उनले सांसदलाई सुनाए । 

यसबाहेक गण्डकीमा कथम कदाचित काङ्ग्रेसको सरकार बन्ने भयो भने त्यतिबेला दलको नेता पुनर्विचार गर्नेबारे देउवाले सांसदलाई जवाफ फर्काएको एक सांसद बताउँछन् । तर अहिले दलको नेता पुनर्विचार गर्दा गलत सन्देश जाने देखेर त्यो आँट कसैले गरेनन् ।

तर, नेकपा फुट, प्रतिगमन, सर्वोच्चका फैसलालगायतका प्रकरणले उनै कृष्णचन्द्र नेपाली अहिले गण्डकीको दोस्रो मुख्यमन्त्री बन्न सफल भएका छन् ।

ती दिनको स्मरण गर्ने एक सांसद भन्छन्,“सरकार बन्ने बेलामा पुनर्विचार गर्ने सहमति भएको थियो ।”

तर, आसन्न महाधिवेशन, प्रतिनिधि सभा विघटनलगायतका घटनाले पनि काङ्ग्रेस फुट होइन जुटतर्फ अग्रसर बन्यो ।

केन्द्रकै राजनीतिक किचलोका कारण कुनैबेला दुइतिहाई सांसदको बहुमतसहित सत्तासीन पृथ्वी सुब्बा गुरुङ नेतृत्वको सरकारले संसद्मा विश्वासको मत लिन नसकेपछि शुक्रबार ढल्न पुग्यो । उनले शुक्रबार विश्वासको मत पाउन सकेनन् ।

उनको विकल्पमा एक चौथाई सांसद रहेको काङ्ग्रेस सत्तारोहण गर्न पुग्यो ।

को हुन त कृष्णचन्द्र ?

गोबर्द्धन शर्मा राणा शासनको विरोधमा क्रियाशील योद्धा हुन् ।  उनी कांग्रेसका तत्कालीन केन्द्रीय सदस्यसमेत हुन् । 
उनै शर्माका छोरा हुन् कृष्णचन्द्र नेपाली । 

तनहुँमा जन्मे पनि उनको राजनीतिक थलो नवलपरासी हो । अहिले पनि उनी पूर्वी नवलपरासीबाट प्रतिनिधित्व गर्छन् । 

उनले विद्यार्थी राजनीति तनहुँबाटै गरेका थिए ।

नवलपुर १(क)बाट निर्वाचित नेपालीले एमाले माओवादी गठबन्धनका उमेदवार सूर्यप्रसाद न्यौपानेलाई ३ सय ८२ मतले पराजित गरेका थिए ।

विद्यार्थीकालदेखि नै उनी राजनीतिमा सक्रिय थिए । २०२८ सालमा नेपाली कांग्रेस तनहुँको जिल्ला सदस्य बने उनी ।

प्रजातान्त्रिक आन्दोलनकै क्रममा उनी ६ पटक जेल परेका छन् । 

२०३५ सालदेखि उनी पटक पटक प्रहरी हिरासतमा पुगेका थिए । विद्यार्थी आन्दोलन होस् या जनमत संग्रह । 

२०३८ सालमा निर्वाचनकै क्रममा प्रहरीबाट निकै यातना खेपेका उनलाई त्यसबेला पनि दुई महिना जेलमा राखिएको थियो ।

बहुदलीय व्यवस्था माग्दै २०४२ सालमा नेपाली कांग्रेसले सत्याग्रह घोषणा गर्‍यो । नवलपुरबाट सत्याग्रहमा सक्रिय भएका पोखरेल परासी–कपिलवस्तुमा गरेर एक वर्ष जेलमा राखियो ।

२०४८ को अधिवेशनपछि उनी निरन्तर ४ कार्यकाल कांग्रेस नवलपरासीको सभापति भए । २०४८ सालको आमनिवौचनमा उनी नवलपरासी क्षेत्र नम्बर ४ बाट प्रतिनिधि सभा सदस्यमा उमेदवार थिए । २०६२–६३ सालको जनआन्दोलनमा उनले नवलपुरको कमान्ड सम्हाले । त्यो बेला पनि पनि उनले जेल परे । 

कांग्रेसको १२औं महाधिवेशनबाट उनी केन्द्रीय सदस्यमा निर्वाचित भएका थिए भने २०७० सालको संविधानसभा चुनावमा कृष्णचन्द्र ३ सय २५ मतले पराजित भए । उनले त्यतिबेला नवलपरासी क्षेत्र नम्बर ३ बाट चुनावी मैदानमा उत्रेका थिए ।

तस्बिर सौजन्य : युनिस गुरुङ