विराटनगर । नेपाली कांग्रेसका केन्द्रीय सदस्य डा. शेखर कोइरालाले कोरोना महामारीसँग जुध्ने उपाय खोप मात्रै भएकोले अनुदानको भरमा मात्र नपरेर खरिद गर्नेतर्फ ध्यान दिनुपर्ने बताएका छन् ।
उनले अहिलेको महामारीबाट पार नपाउने हो भने आर्थिक गतिविधि र जनजीविका नै धरासायी हुने अवस्था आउने भएकोले विकास खर्च कटाएर भए पनि खोप खरिद गर्नुपर्ने बताए ।
शनिबार साझा सवालका लागि साझा मञ्च विराटनगरद्वारा आयोजित झुम अन्तरसंवादमा उनले भने, “सरकार अनुदानमा पाएको खोपको भरमा मात्र परेको छ । तर, यसरी सबै नागरिकले खोप पाउने अवस्था बन्दैन । बरु, पुँजीगत खर्च कटाएर भए पनि खोप खरिद गर्नेतर्फ सरकारले ध्यान दिनुपर्छ ।”
कोइरालाले अहिले देश कोरोना महामारी र राजनीतिक अन्योलका कारण थप चपेटामा परेको बताए । केपी शर्मा ओलीले नेतृत्व गरेको सरकारले निष्पक्ष चुनाव गराउन नसक्ने भन्दै उनले संसद् पुनःस्थापना भए त्यसपछि बन्ने सरकारले चुनाव गराउनुपर्ने बताए ।
निर्वाचन मंसिरमा भनिए पनि त्यसको कुनै पनि तयारी निर्वाचन आयोगले नगरेको बताउँदै कोइरालाले भने, “सरकारले नहुने निर्वाचनको समयतालिका दिएको छ । ओली निर्वाचन पनि नगर्ने र संसद् पनि नरहेको अवस्था सिर्जना गरेर सत्तामा रहिरहने दाउमा हुनुहुन्छ ।” वर्तमान सरकारलाई पदच्युत गरेर नेपाली कांग्रेसको नेतृत्वमा सरकार बने चैत–वैशाखसम्ममा चुनाव हुने उनको भनाइ थियो ।
नेपाली कांग्रेसको पदाधिकारी र कार्यसमितिमा पद थपथाप गरेर अघि बढ्ने सोच बनाए कांग्रेसमा ठूलो निराशा छाउने पनि उनले बताए । कांग्रेस पदाधिकारीको बैठकले कांग्रेस महाधिवेशनको विषयमा निर्क्योल गर्ने आम कार्यकर्ताको अपेक्षा रहेको बताउँदै उनले पदाधिकारी थप गरेर मात्र कांग्रेस अगाडि बढ्न नसक्ने जिकिर गरे ।
महाधिवेशन गर्नको लागि भएको प्रावधान कटिसकेको र अब विशेष अधिवेशन मात्र विकल्प हुन सक्ने बताउँदै उनले भने, “चार वर्ष महाधिवेशन गर्न नसक्ने, संविधानले दिएको अवधि पनि काट्ने अनि फेरि ६ महिना वा एक वर्ष थप गर्ने हो भने कांग्रेस रहँदैन । ६० जिल्लाभन्दा बढीको क्रियाशील सदस्यता आइसकेको छ । यसको विवाद धेरै हुँदैन ।”
