काठमाडौं । नेपाली कांग्रेसका सभापति शेरबहादुर देउवाले पदाधिकारी र पूर्वपदाधिकारीको बैठक डाकेका छन् । महाधिवेशनको मिति र कार्यतालिकका विषयमा छलफल गर्न देउवाले बैठक बोलाएको देउवाका स्वकीय सचिव भानु देउवाले जानकारी दिए ।
“भोलि दिउँसो २ बजे पदाधकारी र पूर्वपदाधिकारीको बैठक डाक्नुभएको हो,” भानुले भने, “महाधिवेशन र समसामयिक विषयमा छलफल आवश्यक भएकाले बैठक बोलाइएको हो ।”
उनले बैठक देउवा निवास बूढानीलकण्ठमै बस्ने जानकारी गराए ।
कांग्रेसले कोरोना महामारी र जिल्ला जिल्लाको विवादका कारण महाधिवेशनको कार्यातालिका अनुसार तयारी गर्न सकेको छैन । उसले फागुन मसान्तबाट चैत मसान्त हुँदै जेठ १५ सम्म म्याद सार्दा पनि क्रियाशील सदस्यता टुंग्याउन सकेको छैन भने असार पहिलो सातादेखि तोकिएका वडा तहका अधिवेशन पनि प्रभावित हुने लगभग निश्चित भएको छ ।
यस्ते बेला देउवालाई वैकल्पिक उपायको खोजीका लागि पार्टीमा दबाब बढेको छ ।