काठमाडौं । नेकपा (एमाले)निकट युवा संघले कोरोनाविरुद्धको खोप स्वयम्सेवक परिचालन गर्ने भएको छ । “कोभिड–१९ खोप सेवालाई अझ सहज र प्रभावकारी बनाउन राष्ट्रिय युवा संघ नेपालले देशव्यापी भ्याक्सिन भोलेन्टियर परिचालन गर्ने निर्णय गरेको छ,” संघका अध्यक्ष किरण पौडेलले विज्ञप्तिमार्फत् बताएका छन् ।
युवा संघका नेता–कार्यकर्तालाई कार्यसूची तोकेरै परिचालन गर्न लागिएको उनले बताएका छन् । प्रत्येक टोल तहसम्मका नागरिक जसले प्रि–आवेदन दर्ता गरेका छैनन् उनीहरूको विवरण संकलन गरी खोप केन्द्रसम्म पुर्याउने तथा अनलाइन आवेदन दर्ता गराउने काम स्वयम्सेवकले गर्ने युवा संघले बताएको छ ।
स्थानीय जनप्रतिनिधी तथा स्वास्थ्य प्रतिनिधिसँग समन्वय गरि जनसरोकारका विषयहरूको सम्बोधन गर्न पहल गर्ने निर्देशनमा भनिएको छ । वृद्ध–वृद्धा, अशक्त, अपांग, असहायहरूलाई यातायातको व्यवस्थापनसहित सुरक्षित तवरले
खोपकेन्द्रमा लाने–ल्याउने काम युवा संघले गर्ने बताइएको छ । खोप सेवामा क्रियाशील चिकित्सक, स्वास्थ्यकर्मीलगायतलाई चिया, खाना, खाजा आदिका लागि आवश्यक सहयोग गर्ने पनि निर्देशनमा उल्लेख छ । खोपकेन्द्रमा लामबद्ध नागरिकले सहज, सरल तरिकाले खोप लगाउन पाउने प्रबन्ध मिलाउने साथै खानेपानी–शौचालय आदिको व्यवस्थापनमा सहयोग गर्ने कार्यसूचीमा तोकिएको छ । खोपकेन्द्र खोप तालिका लगायतका जानकारीमूलक सन्देश प्रवाह गर्ने र यस अलावा खोप केन्द्र तथा मैदानमा आइपर्ने सबै किसिमका स्व्यमसेवी भूमिकाका निम्ती कृयाशिल रहने निर्देशनमा उल्लेख छ ।