काठमाडौं । प्रधानमन्त्री केपी शर्मा ओलीले १९ औं पटक मन्त्रिपरिषद् पुनःगठन गरेका छन् । साढे तीन वर्षे कार्यकालमा सबैभन्दा बढी मन्त्री हेरफेर गर्ने कीर्तिमान कायम गरेका ओलीले यसपटक केही नयाँ अनुहारलाई मन्त्रीमा समेटेका छन् ।
त्यसमा परेका छन्, सिन्धुली १ बाट निर्वाचित, गणेशकुमार पहाडी । बिहीबार थपिएका मन्त्रीमध्ये पहाडी यसअघि माधवकुमार नेपाल गुटमा थिए । पुस ५ गते पहिलोपटक संसद विघटित हुँदा प्रधानमन्त्री ओलीको खरो आलोचक थिए । सडक सङ्घर्षमा पनि होमिएका थिए ।
तर, दोस्रोपटक संसद् विघटित भएपछि उनी सङ्घीय मामिला तथा सामान्य प्रशासन मन्त्री बनेर सिंहदरबार प्रविष्ट भएका छन् ।
पहाडी आधारभूत तहदेखि नै राजनीतिमा उठेका व्यक्तित्व हुन् । २०२७ सालमा जन्मिएका उनी २०३९ सालमा तत्कालीन अनेरास्ववियू पाँचौँमा आबद्ध भएका थिए ।
२०४७ सालमा एमालेको संगठित सदस्यता प्राप्त गरेका उनी २०५४ सालको स्थानीय निकाय निर्वाचनमा सिन्धुलीको खाङसाङ गाविसको निर्विरोध अध्यक्ष बनेका थिए ।
२०६५ सालमा जिल्ला पार्टी सचिव, २०६६ मा संयोजक बनेका पहाडी २०७० सालमा संसदीय फाँटमा छिरेका हुन् । २०७० मा सिन्धुली १ बाट चुनाव जितेका उनले २०७४ सालमा पनि सोही क्षेतबाट चुनाव जितेका थिए ।
पहाडी २०७१ को नवौँ महाधिवेशनपछि पार्टी केन्द्रीय कमिटीका आएका हुन् ।