काठमाडौं । सत्तारूढ पार्टी नेकपा (एमाले)का महासचिव ईश्वर पोखरेलले माधवकुमार नेपाल एमालेमा फर्कने सम्भावना नरहेको निचोड सुनाएका छन् । अनेरास्ववियुले विद्यार्थी फाँटका इन्चार्ज बनेका खिमलाल भट्टराईको स्वागत गर्न पार्टी कार्यालयमा आयोजना गरेको कार्यक्रममा उनले नेपालसहितका नेता एमालेमा फर्कने सम्भावना नरहेको बताएका हुन् ।
“मैले पनि विभिन्नपटक उहाँसँग छलफल गरेँ । धेरैपटक एक्लाएक्लै वार्ता, संवाद भयो । तर, उहाँ पार्टीमा फर्कने सम्भावना देखिन,” महासचिव पोखरेलको भनाइ उद्धृत गर्दै अनेरास्ववियुका अध्यक्ष ऐन महरले बाह्रखरीसँग भने, “तर, उहाँसँग रहनुभएको केही साथीहरू भने सकारात्मक हुनुहुन्छ । उहाँहरूसँग नियमितजसो कुराकानी पनि भइरहेको छ । उहाँहरूलाई फर्काउन हामीले संवाद जारी राख्नुपर्छ ।”
पोखरेलले पार्टी अध्यक्ष केपी ओली र आफूले धेरैपटक कोसिस गर्दा पनि पार्टी एकता गर्न नसकिएको र त्यसमा माधवकुमार नेपालको कुण्ठा, द्वेष र बदला भाव बाधक रहेको निष्कर्ष सुनाएका थिए ।
“उहाँमा व्यक्तिगत कुण्ठा देखिन्छ । विशेषतः पार्टी अध्यक्ष केपी ओलीमाथि । त्यसैले एकता गर्न दिइरहेको छैन । हामीले एकताका लागि कोसिस भने छाड्न हुँदैन,” पाेखरेलकाे भनाइ उद्धृत गर्दै महरले भने ।
उनले अनेरास्ववियुलाई क्रियाशील तुल्याउन र चुनावलक्षित गरेर देशव्यापी संगठन विस्तार गर्न निर्देशन पनि दिएको महरले बताए । “संगठनको काम व्यवस्थित गर्नुस् । नियमति प्रशिक्षण आदि कार्यक्रम सञ्चालन गरेर क्रियाशील तुल्याउनुस् । पार्टीले आवश्यक सहयोग गर्छ,” पोखरेलको निर्देशन रहेको महरको भनाइ थियो ।
कार्यक्रममा पूर्व ऊर्जामन्त्री टोपबहादुर रायमाझी पनि उपस्थित थिए ।