पोखरा । गण्डकी प्रदेशका मुख्यमन्त्री पृथ्वीसुब्बा गुरुङले सदनमा विश्वासको मत लिनुभन्दा एक दिनअघि विपक्षीले प्रदेश प्रमुखसँग भेटवार्ता गरेका छन् । मुख्यमन्त्रीले विश्वासको मत पाउने प्रष्ट आधार नभएको अवस्थामा विपक्षीहरुले प्रदेश प्रमुखसँग भेट गर्नुलाई अर्थपूर्ण रुपमा हेरिएको छ ।

गएको वैशाख २९ गते विपक्षी दलले बहुमत रहेको दाबी गर्दा राष्ट्रिय जनमोर्चाका दुई सांसद तटस्थ रहेको विज्ञप्ति सार्वजनिक भएको थियो । तीमध्ये कृष्ण थापाले आफ्नो पत्र वास्तविक रहेको बताएका थिए । खिमविक्रम शाहीले भने आफ्नो नाममा झुटो प्रचार भएको र उक्त विज्ञप्ति आफ्नो नरहेको भन्दै अस्वीकार गरेका थिए ।

तर, प्रदेश पमुख पौडेलले दुवै सांसद तटस्थ रहेकाले बहुमत नपुग्ने भन्दै मुख्यमन्त्रीमा संविधानको धारा १६८ (३) अनुसार गुरुङलाई शपथ खुवाएकी थिइन् ।

मुख्यमन्त्री गुरुङले उपधारा ४ अनुसार भोलि प्रदेशसभामा विश्वासको मत लिँदै छन् । उनले मत पाउन नसके अर्को सरकार गठनको प्रक्रिया सुरु हुन्छ ।

उक्त अवस्थामा फेरि कसैको झुट विज्ञप्ति सार्वजनिक भएमा के गर्ने भन्ने विषयमा छलफल गर्न विपक्षी नेपाली कांग्रेस, नेकपा (माओवादी केन्द्र), राष्ट्रिय जनमोर्चा र जनता समाजवादी पार्टी (जसपा)का प्रदेश सांसदले प्रदेश प्रमुखलाई भेटेका हुन् ।

बैठकमा जनमोर्चाका सांसद शाहीसहित जनमोर्चाकै पियारी थापा, कांग्रेसका मणिभद्र शर्मा र कुमार खड्का, माओवादी केन्द्रका हरिबहादुर चुमान र रामजी बराल तथा जसपाका हरिशरण आचार्य र धनमाया पोखरेल सहभागी छन् ।