काठमाडौं । फिफा विश्वकप छनोटको दक्षिण अमेरिकी छनोटअन्तर्गत अर्जेन्टिनाले बराबरी खेलेको छ । बुधबार भएको खेलमा अर्जेन्टिनाले कोलम्बियासँग २–२ गोलको बराबरी खेलेको हो ।

कोलम्बियाले घरेलु मैदानमा अर्जेन्टिनालाई बराबरीमा राख्न सफल भएको हो । खेलमा सुरुवाती अग्रता भने अर्जेन्टिनाले बनाएको थियो । खेलको तेस्रो मिनेटमा क्रिस्टियन रोमेरोले गोल गर्दै अर्जेन्टिनालाई अग्रता दिलाएका थिए । आठौँ मिनेटमा लिन्ड्रो डानिल पारेडेसले गोल गर्दै अर्जेन्टिनाको अग्रता दोब्बर पारे ।

पहिलो हाफमा २–० गोलको अग्रता बनाएको अर्जेन्टिनाले दोस्रो हाफमा गोल खान पुग्यो । ५१औँ मिनेटमा लुइस मुरीएलले पेनाल्टीमा गोल गर्दै कोलम्बियालाई २–१ को स्थितिमा ल्याए । खेलको इन्जुरी समयमा मिगुएल बोर्जाले गोल गर्दै कोलम्बियालाई हारबाट जोगाए ।

बराबरीसँगै अर्जेन्टिनाले ६ खेलबाट १२ अंक जोडेको छ । अर्जेन्टिना तालिकाको दोस्रो स्थानमा छ ।