काठमाडौं । एमालेका खनाल–नेपाल समूहले कारबाही फिर्ता नलिए संवाद नै नहुने र कार्यदलको उपादेयता सकिएको बताइरहेका बेला दोस्रो तहका नेता पुनः संवादमा जुटेका छन् ।
प्रधानमन्त्री केपी शर्मा ओली र माधवकुमार नेपाल समूहका दोस्रो तहका नेताहरूबीच एक घण्टादेखि ललितपुरको समिट होटलमा वार्ता भइरहेको बताइएको छ । वार्तामा ओलीका तर्फबाट कार्यदलका संयोजक समेत बनाइएका सुवास नेम्वाङ, विष्णु पौडेल, विष्णु रिमाल, प्रदीप ज्ञवाली रहेको बताइएको छ । यता नेपाल पक्षबाट भने सुरेन्द्र पाण्डे, गोकर्ण विष्टलगायत यसअघि छलफलमा सहभागी हुँदै आएका नेताहरू रहेको बताइएको छ ।
सोमबार मात्रै खनाल–नेपाल समूहले कार्यदलको औचित्य सकिएको भन्दै एकताका लागि ६ बुँदे प्रस्ताव अघि सारेको थियो । र, कारबाही फिर्ताको शर्त अघि सारेको थियो । त्यस्तै उसले अहिले भइरहेका वार्ता, प्रधानमन्त्री ओलीले अघि सारेको एकता प्रस्ताव अल्मल्याउने चालबाजी भएको भन्दै भ्रममा नपर्न अपिल गरेको थियो ।
तथापि, दोस्रो तहका नेता संवादमा जुटेका हुन् ।