काठमाडौं । नेपाली कांग्रेसका अत्यन्त लोकप्रिय नेता नविन्द्रराज जोशीको निधन भएको दुई महिना भइसकेको छ, तर उनको सपना साकार पार्न उनकी धर्मपत्नी सपना जोशी  प्रयासरत छन् । 

चैत १३, २०७७ मा महाप्रस्थान गरेका नविन्द्रराज जोशी आफ्नो जीवनको अन्तिम दिनसम्म पनि कोभिड नियन्त्रणमा सहयोग गर्न मास्क, पन्जा र स्यानिटाइजर आदी वितरण गरिरहेका थिए । गत आम निर्वाचनमा काठमाडौंको ८ नम्बर क्षेत्रबाट पराजित भएता पनि विगतमा आफूलाई जिताएको आफ्नो निर्वाचन क्षेत्रमा लगातार सामाजिक सेवा गरिरहेका जोशीको अचानक मस्तिष्कघात भएर मृत्यु भएको थियो । 

जोशीको “घर दैलो कोभिड–१९ सूचना तथा सेवा अभियान” लाई निरन्तरता दिने क्रममा सपना जोशीले विभिन्न आइसोलेशन सेन्टरमा पीपीई, मास्क, सेनिटाइजर र औषधिहरू वितरण गरेकी छिन् । 

सपना जोशीको सचिवालयले जनाएअनुसार उनले काठमाडौं क्षेत्र नं ८ अवस्थित शान्ती निकुञ्ज स्कूल, आनन्दकुटी विद्यालय, झीगु इना टोल ल्याह्म पुचः, विभिन्न संघ संस्था तथा स्वयम्भू स्थित नेपाल प्रहरी वृत्त, र भगवान पाऊ मा सञ्चालित स्वास्थ्य शिविरमा विभिन्न स्वास्थ्य सामग्री तथा कोभिड–१९ नियन्त्रण सामग्री वितरण गरेकी छिन् ।

त्यसैगरी, क्षेत्र नं १ को रत्नराज्य स्कूल, वानेश्वर, क्षेत्र नं. ७ को वडा नं १७ ढल्को अवस्थित आइसोलेसन सेन्टर, क्षेत्र नं. ४ को वडा नं ३० रातोपुलको आइसोलेसन सेन्टर तथा प्यारागन स्कूलमा पनि सपना जोशीले स्वास्थ्य सामग्री वितरण गरेकी छिन् ।

उनले नागार्जुन नगरपालिका वडा नं. १, सिन्धुपाल्चोक स्थित त्रिपुरासुन्दरी गाउँपालिका, तथा रोल्पाको लुङ्ग्री स्वास्थ्य चौकीका लागि पनि विभिन्न स्वास्थ्य सामग्री सहयोग गरेकी छिन् ।