काठमाडौं । नेकपा एमालेका नेता घनश्याम भुसालले आफूहरू विरुद्ध अनर्गल प्रचार भएको दुःखेसो पोखेका छन् । एकताको कुरा गर्दा त्यसलाई आत्मसमर्पणको रुपमा व्याख्या गर्ने र विवादको कुरा गर्दा विभाजनको रुपमा व्याख्या गर्ने एउटा समूह नै तयार भएको टिप्पणी गरेका हुन् ।
“फेरि हाम्राविरुद्ध अनर्गल प्रचार सुरु भएको छ । हामीले एकताको कुरा गर्दा त्यसलाई आत्मसमर्पणको रुपमा व्याख्या गर्ने र विवादको कुरा गर्दा विभाजनको रुपमा व्याख्या गर्ने एउटा समूह नै तयार भएको छ,” भुसालले सामाजिक सञ्जालमार्फत् भनेका छन्, “पञ्चायतकालमा राजनीतिलाई विकृत बनाउने सत्ता संरक्षित समूह मण्डलेका रूपमा स्थापित भयो । पञ्चायत धराशायी हुनुमा त्यस समूहको कम्ति योगदान थिएन । त्यसबेलाका कतिपय पञ्चहरु नै त्यस समूहसँग आजित भएर संसदमै ‘सुकुलगुण्डा’ भनेर विरोध गरेको सम्झिन्छु ।”
आज नेकपा एमालेको राजनीतिलाई विकृत बनाउन त्यस्तै समूह त खडा भएको छैन ? भन्दै उनले प्रश्न गरेका छन् र परिणाम पनि त्यस्तै हुने त होइन भन्ने आशंका व्यक्त पनि गरेका छन् । “धेरैजसो सपेराहरु सर्पबाटै टोकिएका छन्,” उनको टिप्पणी छ ।