काठमाडौं । नेकपा एमालेका अध्यक्ष तथा प्रधानमन्त्री केपी शर्मा ओलीले आइतबार पार्टी एकताको आह्वान गर्दै ६ बुँदे प्रस्ताव अघि सारे । उनले एकताका लागि पार्टी कमिटीलाई जेठ ३ अघिको अवस्थामा फर्कन आफू तयार भएको तर सर्वोच्च अदालतमा दायर गरेको रिटमा गरेको हस्ताक्षर फिर्ता लिनुपर्ने शर्त तेस्र्याएका छन् । 

उनको वक्तव्यमा खनाल–नेपाल समूहको विभक्त प्रतिक्रिया आएको छ । केही नेताहरुले पार्टी एकताको ढोका खुलेको प्रतिक्रिया दिएका छन् भने केहीले फण्डाको संज्ञा दिएका छन् । 

यस्तो छ प्रतिक्रिया 
उक्त समूहका स्थायी कमिटी सदस्य योगेश भट्टराईले ओलीको वक्तव्य सकारात्मक भएको प्रतिक्रिया दिएका छन् । उनले वक्तव्यले कार्यदलस्तरको वार्ताका लागि बाटो खुला गरेको दाबी पनि गरेका छन् । 

“नेकपा एमालेका अध्यक्ष कमरेड केपी शर्मा ओलीले नेकपा एमालेको एकताका लागि सार्वजनिक वक्तव्य मार्फत गर्नु भएको आह्वान मुलत सकारात्मक छ । कार्यदल स्तरको छलफललाई यो वक्तव्यले पुनः निरन्तरता दिन बाटो खुलेको छ । पार्टीका जिम्मेवार नेता कमरेडहरू सम्मिलित कार्यदलले स्पष्ट गर्नु पर्ने र मिलाउनु पर्ने थप विषयहरूलाई समाधान गर्ने छ,” उनको जिकिर छ ।

त्यस्तै स्थायी कमिटी सदस्य एवं प्रदेश एकका संयोजक भीम आचार्यले भने पार्टी एकताका लागि नेतृत्त्व छाड्न नेताहरुलाई प्र्रस्ताव गरेका छन् । उनले नेताहरुले अभिभाकत्व ग्रहण गर्दै दोस्रो पुस्तालाई पार्टी नेतृत्वमा ल्याउन मध्यमार्गी प्रस्ताव गरेका हुन् । 

उता, उक्त पोलिटव्यूरो सदस्य जगन्नाथ खतिवडाले भने ओलीको वक्तव्य झुठ र भ्रमको पुलिन्दा भएको टिप्पणी गरेका छन् । ओलीले आफ्नो गल्ती स्वीकार नगरेको उनको निष्कर्ष छ ।

“आफूले गल्ती गरेको स्वीकार गरेका छैनन् । समग्रमा यो झुठ र भ्रमको पुलिन्दा हो । कोही पनि भ्रममा नपर्नु होला । संसद विघटन गरेकोमा माफी माग्नु र विघटन फिर्ता लिनुपर्ने प्रमले उल्टै मुद्दाबाट हस्ताक्षर फिर्ता लिने कुरा गरेर नैतिकता कै धज्जी उडाइदिएका छन् । केपी ओलीको मनखुसीले निकालेको वक्तव्यमा हाम्रो सहभागिता छैन र यो असमान लिखत हामीलाई मान्य छैन । कोही भ्रममा नपर्नु हुन अनुरोध गर्दछु,” उनले भनेका छन् ।

नेतृ रामकुमारी झाँक्रीले पनि ओलीको वक्तव्यलाई फण्डाको संज्ञा दिएका छिन् । उनले आइतबार राति नै सामाजिक सन्जालमार्फत घोषणा गरेर ओलीले एकता गर्न नखोजेको बरु झुक्याउन, अल्मलाउन र मिडिया कन्जम्सनको लागि मात्रै ल्याइएको समेत दाबी गरेकी छन् ।

त्यस्तै प्रदेश ३ का सांसद तथा नेता अरुण नेपालले ओलीको वक्तव्यले पार्टी एकताको आधार दिएको जिकिर गरेका छन् । उनले पार्टी एकता अभियानलाई गतिशील बनाउन ढिला नगर्न पनि आग्रह गरेका छन् । “पार्टी अध्यक्षबाट आज जारी भएको वक्तव्यको अध्ययन गरौं । आजको प्रमुख आवश्यकता एमालेको एकता हो । हाम्रो विभाजनले ल्याउने संकट भयावह हुन्छ । विभाजनलाई कसैले पनि ठट्टा ठान्ने भुल नगराैं । यो वक्तव्यले एउटा आधार दिएको छ । यसमा टेकेर पार्टीको एकता अभियानलाई गतिशील बनाउन ढिला नगरौं,”उनको आग्रह छ । 

त्यस्तै उक्त समूहका नेता सुरेन्द्र मानन्धरले ओलीको प्रस्तावले छलफलको ठोस आधार बनाएको बताएका छन् । उनले सामाजिक सन्जालमार्फत् भनेका छन्, “पार्टी अध्यक्ष केपी ओलीले अघि सार्नु भएको ६ बुँदे प्रस्तावले लगभग छिन्नभिन्न हुन पुगेको पार्टीलाई एकताबद्ध बनाउन छलफलको ठोस वातावरण सिर्जना गरेको छ । यो अवस्थालाई फेरि पनि स्वार्थ पूर्ति गर्ने, जालझेल र षड्यन्त्रको खेलको रुपमा कतैबाट प्रयोग नहोस् । वास्तविक र ठोस एकताको लागि सदुपयोग गरियोस् । के हुनु पर्थ्यो ? के भएन ? के हुन्छ ? र के गर्ने ? अब सौहार्दपूर्ण ढंगले नेताहरु कमरेडली भवनाले बसी टुङ्ग्याउनु पर्छ,” उनको भनाइ छ ।

उनले नकारात्मक टिप्पणी नगरी सकारात्मक रुपमा अघि बढ्नुपर्ने पनि बताएका छन् । ओलीको प्रस्तावबारे आधिकारिक धाराणा बनाउन आज स्थायी कमिटी बैठक बस्दैछ ।